في سلسلة مقالات – أنت قصة حياتك ايه؟ – هنتكلم عن أشخاص ملهمين قرروا إنهم يغيروا الواقع اللي بيعيشوه ويكون ليهم دور إيجابي أكتر في الحدوته بتاعتهم.
الكلام ده مش بس على عظماء في مجالات التاريخ والعلوم وإدارة الأعمال والرياضة، لكن كمان هنوضح قصص لناس عاديين، أو كنا فاكرينهم عاديين لحد ماعرفنا قصتهم، ناس شبهك وعندهم مشاكل وصعوبات وحياة شكلها عادية، بس بياخدوا قرار إنهم يغيروها ويكتبوا قصة حياتهم بشكل مختلف.
قصة حياة التوأم
هنتكلم على قصة التوأم وازاي كل واحد فيهم اختار قصة حياته، ولأ مش هنتكلم على حسام حسن وإبراهيم حسن، هنتكلم على قصة توأم تاني عاشوا ظروف مشابهة وطلعوا منها بنتيجة مختلفة.
الاتنين دول كانوا عايشين حياة سعيدة مع أبوهم وأمهم وكل واحد فيهم كان راسم قصة حياة معينة ليه في خياله، لحد ما الأب اتشقلب حاله ودخل في سكة الشرب والخمرة ومبقاش مهتم بالبيت ولا بيصرف على البيت ولابيخلي باله من الولاد ولا الأم. بالعكس؛ ده بقى عصبي وبيزعق علطول وبقى عالة على البيت والأسرة كلها، وساب البيت ومشي أساساً، وبعد فترة عرفوا إنه اتوفى في حالة مزرية.
المهم التوأم كبروا وكل واحد فيهم شق حياته بشكل مختلف تماماً عن التاني: واحد منهم دخل الجامعة واتخرج واتجوز وبقى متفوق في شغله وزوج وأب ناجح… أخوه بقى راح في سكة تانية خالص، ساب الجامعة وبقى علطول بيشرب خمرة وبيلعب قمار ومش عارف يلاقي شغل وحالته صعبة جداً.
لما كل واحد منهم اتسأل انت ليه وصلت للي انت فيه ده، الاتنين جاوبوا نفس الإجابة بالضبط، الاتنين قالوا: “مستني ايه مني بعد ماشفت اللي حصل مع أبويا”.
نفس ظروف التربية والنشأة بالضبط ونفس الإجابة قالوها، بس كل واحد فيهم خد المشكلة اللي شافوها في أبوهم بوجهة نظر تانية وغيرت مسار حياتهم وكتب قصة حياة ليه بشكل تاني خالص.
واحد أخد مشكلة أبوه عظة وعبرة وقرر إنه مش هيبقى زي أبوه عشان شاف أخرة الطريق ده، والتاني استسلم وبص للموضوع إن ده قدره ونصيبه وكأن ده العادي ليه وطبيعي إنه يمشي في السكة دي زي أبوه.
قصة حياة رضا هندي البنهاوي
قصة حياة التوأم الأشهر في السينما المصرية، رضا هندي البنهاوي، اللي قام بدوره أحمد حلمي في فيلم “كده رضا”. كانوا تلات توائم طبق الأصل في الشكل والظروف اللي اتربوا فيها والبيت وكل حاجة. كل واحد فيهم اختار قصة لحياته مختلفة تماماً عن التاني واختار لنفسه اسم تاني؛ فيه “البرنس” اللي شايف نفسه جامد ومحدش يقدر يقوله حاجة، فيه “بيبو” محنون الكورة، وفيه “سمسم” اللي مهتم بالكتب والانترنت والمعرفة. هنسيب رابط بملخص قصة الفيلم في الاخر (١).
مش هنحكي قصة الفيلم كله، هنركز بس على مشهد واحد، اللي كان فيه “سمسم” الغلبان اللي في حاله اللي لا بيهش ولا بينش، بس قرر في موقف معين قدام الدكتور النصاب إنه يتقمص دور أخوه “البرنس” ويغير مسار حياته ويكتب قصة جديدة لنفسه.
طبعاً إحنا مش بندافع عن حد في الفيلم، لإن كلهم نصابين في بعض، أنا بس بتكلم على فكرة ازاي إنك تقدر تختار وتغير قصة حياتك على حسب انت بتبص للأمور ازاي.
المصادر والمراجع:
https://ar.wikipedia.org/wiki/%D9%83%D8%AF%D9%87_%D8%B1%D8%B6%D8%A7_(%D9%81%D9%8A%D9%84%D9%85)
٢- سلسلة بداية جديدة من اتعلمت ايه