أسمي محمد علي، حالياً مدير لقطاع المبيعات في شركة عالمية لمستحضرات التجميل، عايش في مصر، متجوز وعندنا الحمد الله ولدين مطلعين عينينا 🙂
بحاول أطور من نفسي دايماً بطرق مختلفة، سواء رياضة أو قراية أو كورسات أو فيديوهات، ولما لقيت إن بقالي سنين وجمعت خبرات كويسة كمان من الشغل والتعامل مع الأفراد في مواقف ومجالات مختلفة؛ قررت إني أعمل المدونة دي عشان أشارك الأفكار والحاجات اللي بتعلمها مع غيري…
ومش جاي هنا عشان أنظر على حد أو أقول إني جامد، عادي جداً إن يكون فيه حاجات من اللي بكتب عنها لسه مقدرتش أنفذها في حياتي العملية بنفس المستوى… كلنا بنتعلم لسه وهنفضل نحاول
في الشركة الحالية واللي قبلها؛ كنت بقدم تدريبات عن مهارات التواصل والتعامل مع الأفراد وطرق القيادة للفرق المختلفة جوة الشركة أو لطلبة جامعات مختلفة… وكنت رئيس اتحاد طلبة في المدرسة وفي الجامعة
دارس علوم سياسية وإدارة أعمال، ومكنتش بطيق القراية لحد من كام سنة، لما ابتديت أقرا في مواضيع بحبها، مش مواضيع مفروضة عليا، حسيت إن القراية بتخلي الواحد يعيش جوة الأحداث بشكل تاني خالص؛ وفعلاً حسيت بفائدتها وتأثيرها في التفكير ونظرتي لحاجات كتير حواليا