الحفاظ على الصحة العقلية مهم جداً في وسط عالم مليان بأزمات ومشاكل مستمرة في كل حته، أزمات ممكن تبقى بعيدة عنك ومآسي ممكن تبقى قريبة منك وتمسك وتأثر عليك أو تأثر على حد يخصك بشكل شخصي. هنحاول نجاوب على سؤال: المفروض إني أتابع اللي بيحصل ولا المفروض أعزل نفسي عن الأخبار. وهنتكلم برضه على ٦ خطوات ممكن تعملها في مختلف الأزمات والمواقف الإنسانية عشان يبقى ليك دور فعال.
قصدنا ايه بالأزمات والكوارث
كنا اتكلمنا في مقالة قبل كده عن ٤ خطوات للمحافظة على الصحة العقلية ومواجهة ضغوط الحياة (لينك المقالة في المصادر ١). بس انهاردة موضوعنا أكبر من الضغوط اللي بنقابلها في حياتنا العادية، بنتكلم على أزمات زي الإبادات والحروب والانفجارات، أو كوارث طبيعية زي السيول والزلازل والبراكين. مش بستهون بمشاكلك الشخصية وضغوطات الحياة اللي بتتعرضلها، بس لما بتشوف الأزمات دي بتتعظ وتعرف إن يومك العادي بمشاكله دي طلع نعمة وإنجاز مقارنة بمصايب بتحصل لناس تانية.
الموضوع مش بس حاجات بنشوفها في التليفزيون ولا على صفحات التواصل الاجتماعي، وحاجات بتحصل في بلاد تانية بعيدة عننا، كلامنا انهاردة ممكن كمان يخص أزمات بتحصل لينا زي لما بتحصل سيول في بعض المحافظات، ولا زلزال ١٩٩٢، ولا العاصفة بتاعة مارس ٢٠٢٠، ولا أوبئة وانتشار أمراض زي الكوفيد.
تعريف الصحة العقلية وعلاقتها بالأزمات
بعد ماوضحنا قصدنا إيه بالأزمات والكوارث، تعالوا نشوف يعني ايه الصحة العقلية وعلاقتها وأهميتها في مواجهة الأزمات دي. منظمة الصحة العالمية بتعرف الصحة العقلية بأنها الحالة الجيدة من صحة العقل واللي يقدر يستغل عن طريقها قدراته الخاصة، ويقدر يتعامل مع ضغوط الحياة والمساهمة في بناء مجتمعه (٢). الاضطرابات في الصحة العقلية ممكن تحصل بسبب أزمات كبيرة بيتعرضلها الشخص أو صدمات بيقابلها وبيشوفها حواليه.
مهم جداً نتفق إن قوة موقفك وقوة دورك الفعال في المواقف دي بيبقى نتيجة لقوة الصحة العقلية اللي بتتمتع بيها، ولازم تكمل في طريقك وتطور وتتحسن في شغلك أو دراستك وتنجح في مجالك وتقوي نفسك أكتر عشان تقدر تساعد غيرك حسب الهدف اللي عندك. لإن لو أنت وقعت اللي حواليك هيقعوا معاك، سواء معتمدين بشكل كلي عليك، زي عيلتك، أو بيستمدوا الإلهام والطاقة منك زي زمايلك وصحابك، أو الناس اللي أنت هدفك تساعدهم ويبقى ليك دور فعال معاهم في وسط الأزمات.
الصحة العقلية بين المتابعة والعزلة
لازم بعد فترة من متابعة الأزمات والكوارث يحصل تأثير على الصحة العقلية عند الشخص، مهما كان فاكر نفسه قوي وقادر يستحمل، لإن في الاخر كلنا بشر. طبعاً الموضوع ممكن يفرق من شخص للتاني على حسب قدرة تحمله من ناحية وحجم المعاناة والمآسي اللي بيتابعها من ناحية تانية، خصوصاً لو كانت أزمة مستمرة لفترة طويلة.
ومن هنا يبدأ الشخص يفكر إن عشان أحافظ على اللي فاضلي من الصحة العقلية ممكن أوقف متابعة للي بيحصل وأروح في عزلة عن الموضوع ومليش دعوة خالص… لكن العزلة التامة عن الأحداث ده اتجاه غير واقعي لانتشار الأخبار في كل حته حوالينا، بالإضافة إلى إن العزلة دي ممكن تكون حاجة غلط لدورك كإنسان محتاج يتواصل مع الواقع اللي حواليه وممكن يتعظ من اللي بيحصل، وممكن يبقى ليك دور فعال. كمان أنت شخصياً هتحس بتأنيب ضمير وتقصير تجاه واجبك نحو الإنسانية بإنك بتمنع نفسك من مجرد المتابعة. ينتهي الأمر إن في الآخر تلاقي إن العزلة اللي كنت عايز تعملها عشان تحافظ على قوة الصحة العقلية عندك بتضرك وبتتعبك أكتر كمان بعد فترة.
عشان كده لازم الموازنة بين المتابعة والعزلة للحفاظ على الصحة العقلية، وتقدر تكمل إن يبقى ليك دور فعال بعد كده. ماهو لا تسيب نفسك قاعد ٢٤ ساعة بتتابع أخبار الأزمات اللي حواليك، ولا تعزل نفسك تماماً وكأنك في كوكب لوحدك. ولما تيجي تتبع أخبار الأزمات اللي حواليك، بلاش دي تبقى أول حاجة في يومك ولا تبقى آخر حاجة قبل ماتنام، عشان التوقيتات دي بتأثر بشكل أكبر على الصحة العقلية اللي احنا بنحاول نقويها.
في نفس الوقت، اتأكد إنك بتعمل بشكل يومي أنشطة بتحبها، سواء رياضة ولا قراية ولا حتى الفرجة على أفلام في التليفزيون، وماتحسش إنك معندكش دم عشان بتدي لنفسك الوقت ده وتفصل من الأحداث، وكأنك مقصر في حق الناس اللي بتتعرض للأزمة؛ بالعكس انت بتشحن الصحة العقلية اللي عندك عشان تقدر ترجع أقوى وأجمد وأنت بتابع وتقدر تقوم بدور فعال أقوى في المساعدة.
قوة الدور الفعال من قوة الصحة العقلية
متفتكرش إن ملكش دور تعمله ولا إنك واقف مكتوف الأيدي تماماً، مبقولكش إنك هتحل المشاكل كلها بنفسك وهتحل الأزمات من جذرها، بس أكيد ليك دور تقدر تعمله، حتى لو دور صغير بس هيبقى ليك دور فعال جوة دايرة تأثيرك.
١- التوعية: عرف الناس على الأوضاع والأحداث والأزمات، اكتب وشارك على مواقع التواصل الاجتماعي عشان المشاركة الإنسانية توصل لعدد أكبر وكل شخص يقدر يعمل دور فعال، يتحرك علطول.
٢- الدعم المعنوي: عن طريق إرسال رسائل مباشرة للأشخاص العالقين في وسط الأزمات دي من خلال وسائل التواصل الاجتماعي أو عن طريق إظهار تعاطفهم في تجمعات وتقديم رموز ويفط ورسائل عن المشاكل في الأماكن دي، بالإضافة إلى حث المسئولين على انقاذ الوضع الإنساني هناك.
٣- التبرع: كل واحد طبعاً وحسب قدراته المادية، ممكن يتبرع ويقدم مساعدات مالية أو عينية للجهات المسئولة عن إعانة الأشخاص اللي في الأزمات دول. أتأكد بس إنك بتقدم المساعدات لجهات موثوق فيها هتوصل الدعم بجد لمستحقيه.
٤- التطوع: في بعض المواقف، خصوصاً لو في منطقة جغرافية قريبة منك، تقدر تطوع بالشكل اللي يناسبك، فيه ناس بتطوع بقدراتها البدنية في تحضير المساعدات وترتيبها، أو جهود الإنقاذ أو حتى التطوع في جلسات لاحتواء الناجين من الأزمة، وده مهم جداً جداً. وفيه ناس بتطوع عن طريق جمع التبرعات للأزمة دي، من الاخر كل واحد وتخصصه أو مهنته أو قدراته الشخصية.
٥- التثقيف: بعض الناس بتفضل إنها تستغل الأزمات والظروف الإنسانية الكبيرة دي عشان تثقف نفسها وتقرا وتفهم أكتر كيفية حل المشاكل دي عبر التاريخ، والخلفية الثقافية أو الإنسانية الي بيحصل، عشان لما يتحطوا في موقف شرح أو توضيح لوجهة نظر يقدروا يدعموا الموقف اللي بيساندوه على أساس علمي تاريخي قوي بالحقائق والمصادر.
٦- التربية: تعليم أولادك أو قرايبك أو الأطفال في المنطقة حواليك على أهمية متابعة الأزمات والمواقف الكبيرة اللي بتحصل حواليك والوقوف مع الإنسانية والحقوق المفروض يحصل عليها الناس، وعدم السكوت أو الخوف أو إنهم يقولوا ملناش دعوة، لإن كلنا بشر بنتعامل مع بعض ومشاكلنا بتمس بعض.
الخلاصة:
لازم توازن بين المتابعة والعزلة عن أخبار الأزمات والكوارث عشان تحافظ على الصحة العقلية عندك، اللي هي مهمة جداً ليك وللي حواليك وكمان للناس اللي بيتعرضوا للأزمة دي وأنت عايز تساعدهم. متفتكرش إن ملكش دور فعال في مساعدك غيرك، ممكن تعمل كذا حاجة، ومتستهونش بتأثيرهم، زي: التوعية، الدعم المعنوي، التبرع، التطوع، التثقيف، التربية.
المصادر والمراجع:
١- مقالة من اتعلمت ايه عن ضغوط الحياة
علمياً: ٤ خطوات لمواجهة ضغوط الحياة – اتعلمت إيه؟ (et3alemteh.com)
٢- تعريف الصحة العقلية
:اقرا المزيد من خلال موقع الطبي
٣- أخبار الحروب وتأثيرها على الصحة العقلية
News of war can impact your mental health – here’s how to cope (theconversation.com)
ddvi7y