بداية جديدة – الجزء الأول: سنة جديدة

كل سنة وأنتم طيبين، بداية جديدة وسنة سعيدة عليكم إن شاء الله. من الحاجات المعروفة عن أول يناير إنه وقت الحماس والتغيير. على رأي شعبان عبد الرحيم: “هبطل السجاير وأكون إنسان جديد، ومن أول يناير خلاص هشيل حديد”… بداية جديدة وأهداف بنحطها لنفسنا؛رياضة، أكل صحي، قراءة، تحويش فلوس، استثمار، صلاة وعبادة… أمثلة المجالات والأهداف اللي بتتحط ملهاش حصر.

بداية جديدة بجد ل٩٪؜ بس!

٩٪؜؜ بس بيلتزموا لحد أخر السنة بالقرارات اللي عملوها في يناير. عشان كده هنتكلم على مدار كذا مقالة على فكرة إن يبقى فيه بداية جديدة وايه اللي بيخلينا نبدأ أساساً. برضه هنتكلم ايه اللي ممكن يضمنلنا إننا نوصل وننجح ونكمل، ونبقى من ال٩٪؜. 
الموضوع مش بس ليه علاقة بقرارات راس السنة، لكن كل بداية جديدة بنحطها لنفسنا أو لفريقنا. مهم اوي نعرف ازاي نحط أهداف واضحة واقعية تخلينا نوصل للي عايزه.

ده لينك لمقالة بتتكلم عن إحصائيات عن قرارات راس السنة في أمريكا عبر السنين. بتوضح كمان أهم القرارت و نسبة الالتزام لكل بداية جديدة عبر الشهور… مقالة خفيفة لذيذة وهتلاقي إن الناس شبه بعض حتى لو عايشين في حتت مختلفة من العالم.

New Year’s Resolution Statistics (2022 Updated) – Discover Happy Hader

ليه أي بداية جديدة مربوطة بتاريخ معين؟

هتلاقي دايماً ده اللي بيحصل، بتبدأ بداية جديدة مع سنة جديدة. أو تستنى لحد عيد ميلادك عشان تغير حاجة معينة. وساعات بتستنى لحد أول يوم في الشهر أو يوم ١٥ مثلاً في نص الشهر. وطبعاً أشهر بداية جديدة هي إنك تبدأ دايت من يوم الحد، عشان نعد تاكل براحتك في الويك اند لحد أخر لحظة. 

تعالوا نشوف مع بعض ايه أهم الأسباب اللي بتخلينا نستنى على أي بداية جديدة لحد تاريخ معين:

١- الترند أو الموضة: كل شوية هتلاقي حد من صحابك يسألك على قرارات السنة الجديدة، أو ناوي تغير ايه في السنة الجاية. ولو عيد ميلادك، حد هيقولك ناوي تعمل ايه بعد مابقيت … سنة. الموضوع بيبقى فيه ضغط من الصحاب وكل الناس بتتكلم على القرارات والتغييرات اللي لازم تعملها. وعشان تركب الترند وتبقى ماشي على الموضة، بتفكر في بداية جديدة لما العداد يجي يقلب سنة ميلادية جديدة أو عيد ميلادك أو شهر جديد حتى.

٢- أسهل في الحساب: يمكن سهولة إننا نفتكر ابتدينا امتى التغيير دي حاجة تبان بسيطة، بس هي فعلاً بتفرق مع الناس. اللي هو أنا بقالي شهرين وأسبوع مبطل سجاير. وممكن حدي يقولك أنا ملتزم بالدايت بالظبط بقالي ١٢ يوم… ده عامل نفسي قوي جداً ومهم للشخص، إنه يبقى قادر يعد ويشوف بقاله قد ايه في التغيير ده، وبسهولة من غير مايتوه من دماغه التاريخ اللي قرر فيه يبقى عنده بداية جديدة.

٣- الخوف من التغيير: بعض الناس مبتبقاش مستعدة للتغيير أو مش مقتنعة بيه اوي، فبيحاولوا يبعدوا تاريخ البداية. الناس دي بتماطل شوية، وتقول طب هبدأ من السنة الجديدة أو بعد عيد ميلادي أو أول الشهر عشان خاطر خايفين. الناس دي بتفكرني بإسماعيل ياسين لما كان لازم ينط في البحر في تدريب السباحة في الجيش, وكل شوية يدخل حد قدامه في الطابور لحد لما مبقاش فاضل غيره، واضطر ينط. الناس دي بتعمل كده بالضبط، يزقوا الأيام ولا الشهور لحد مايجوا في تاريخ معين يجبروا نفسم إنهم يبدأوا فيه.

٤- الحكاية أحلى: أكيد كل بداية جديدة بتحمس الشخص نفسه أكتر لما يعرف يحكيها للي حواليه بشكل أفضل. وفعلاً القصة بتبقى أحلى لما تيجي تقول إنك لما تميت عيد ميلادك الكذا قررت تغير حياتك. أو مع الدقائق الأولى لسنة ٢٠٢٣ حسيت إنك لازم تاخد موقف مع نفسك وتكون إنسان جديد. 

ريتش رول وبجد بداية جديدة وحكاية أحلى!

هكمل على النقطة اللي فاتت في أسباب إننا بنستنى تاريخ معين عشان نبدأ بداية جديدة، وأقولكم إن من أكتر القصص اللي عديت عليا وكان شكلها حلو في موضوع تغيير الشخصية مع عيد ميلاد جديد كانت قصة ريتش رول. الراجل ده أسطورة في عالم رياضات التحمل وبطولات الرجل الحديدي (سباحة + عجلة + جري). دلوقتي عنده ٥٦ سنة، وبالإضافة لاستمراره في ممارسة الرياضة هو بيكتب كتب ويعمل فيديوهات تحفيزية وبيستضيف شخصيات مؤثرة في حلقاته اللي بيعملها على الانترنت.

حكايته قوية جداً لما بيحكيها أو يكتب عنها وازاي قرر يغير حياته مع عيد ميلاده ال٤٠ ويتغير ١٨٠ درجة: من أكل غير صحي ومش قادر يطلع السلم وعدم نجاح في الشغل، إلى بطل رياضي عظيم وشعلة نشاط وطاقة أمل للي متابعينه.

الصورة اللي تحت دي كان نشرها على انستجرام، وباين أوي فيها ازاي بيستغل فكرة عيد ميلاده كرمز لكل بداية جديدة. بيقول إنه وصل لأفضل أداء رياضي ليه في سن ال ٤٣. وأول كتاب كتبه وهو عنده ٤٤ سنة. وبدأ البودكاست الخاص بيه في سن ال٤٥. وهو عنده ٣٠ سنة كان شايف ان حياته انتهت وفي سن ال٥٢ شايف إنها لسه بتبدأ.

طريقة عرضه للقصة بتاعته وربطها بتواريخ معينة بيجمع كذا نقطة من اللي قولنهاهم فوق مخلية شكل الحدوتة حلو أوي.

ريتش رول رمز قوي لكل حد بيدور على بداية جديدة، وأكيد هنتكلم عليه أكتر في سلسلة مقالات “دروس من الرياضة” 

دروس من الرياضة – اتعلمت إيه؟

غير إننا كمان هنستفيد من حلقاته وضيوفه اللي فعلاً كتير منهم بيقول كلام مفيد جداً. بس للي حابب يعرف أكتر عنه دلوقتي، ده الموقع الخاص بيه:

Athlete/Author Rich Roll

الخلاصة:

حلو إنك تقرر تبدأ بداية جديدة، حتى لو مع راس السنة أو عيد ميلادك، سواء عشان تركب الترند أو أسهل في العد أو بتجبر نفسك تبدأ أو عشان لما تنجح، إن شاء الله، الحدوتة يبقى شكلها حلو. بغض النظر عن سبب اختيارك لتاريخ البداية، المهم تكمل وتبقى من ال٩٪؜ اللي فعلاً بيحققوا بداية جديدة في حياتهم، وده اللي هنتكلم عليه أكتر في المقالات الجاية.