ازاي أتأكد إذا كنت إنسان كويس ولا لأ؟

كل واحد مننا بيعدي بمرحلة يسأل فيها نفسه ازاي أقدر ابقى إنسان أفضل ويبقى عندي إضافة للي حواليا. في العادي ده بيبقى سؤال معقد وإجابته مش سهلة، بس الظروف الحالية اللي بنعيشها اديتنا حل مباشر للمشكلة دي.

الحل اللي بقترحه هو إننا ننفذ ونتبع الكلام الموجود في المادة رقم ٣ للإعلان العالمي لحقوق الإنسان: “لكلِّ فرد الحقُّ في الحياة والحرِّية وفي الأمان على شخصه”. خلوني أشارك معاكم وجهة نظري في ازاي نقدر ننفذ المادة دي، وتفسيري لمعناها من غير ماتحكم على الرأي قبل ماتقراه (١).

*كل اللي بقوله هنا هو تعبير عن رأيي الشخصي، مش المفروض إن يتم ربطه بأي شخص أو مؤسسة تانية، محرد إنسان من حقه يقول رأيه.

الحل لكل إنسان في ١٩٤٨، طب ٢٠٢٣؟

سريعاً كده هنتكلم من بعض المصادر عن ازاي الإعلان ده كان مطلوب كحل لكل إنسان في الوقت ده. اعتمدت الجمعية العامة للأمم المتحدة الإعلان العالمي لحقوق الإنسان خلال جلستها العامة الـ183 المنعقدة في باريس في 1948، وكان ذلك نتيجة لما مر به العالم أثناء الحرب العالمية الثانية. مع نهاية الحرب وإنشاء الأمم المتحدة، قرر المجتمع الدولي محاولة منع تكرار المعانات والويلات التي عاشها أكثر من ٥٠ مليون إنسان أثناء سنين الحرب (٢). الحرب العالمية الثانية كانت أكبر صراع عسكري حدث في تاريخ البشر، وأكثرهم عنفاً. الإحصائيات الرسمية أعلنت عن وفاة حوالي ١٥ مليون عسكري بالإضافة إلى ٣٨ مليون مدني (٣).

خليك إنسان أفضل من خلال المادة التاته

تعالوا نوضح تاني أصل المادة دي: “لكلِّ فرد الحقُّ في الحياة والحرِّية وفي الأمان على شخصه”…

عشان منبعدش عن الهدف الرئيسي انهاردة، هعدل كلمة “لكل فرد” وأبدلها ب “كل مدني”. ده مش معناه إن الغير مدنيين ملهمش حقوق إنسان، بس ممكن ناخد الموضوع ده في مقالة منفصلة. وهنركز برضه على جزء “الحق في الحياة”.

خلينا نعدلها مبدئياً دلوقتي كده: “لكل مدني الحق قي الحياة والحرية…”، تمام كده لحد دلوقتي؟ طب تعالوا ناخد خطوة زيادة ونتأكد إن كلنا مفهومنا واحد بالنسبة لمين هو المدني، تعريفه طبقاً لقاموس أوكسفورد البريطاني: هو إنسان ليس جزء من القوات المسلحة أو الشرطة (٤). ولما نيجي نوضح كلمة الحق في الحياة، هخليها أبسط وأقول “عدم القتل”.

كده بقت نسختي الموضحة من فهم جزء من المادة ٣ بتقول: لكل إنسان مدني الحق في عدم التعرض للقتل.

خليك إنسان أفضل بالتزامك بكلمة: كل

لو عايز بجد تحس إنك إنسان أفضل وعمدك جزء من الإنسانية التزم بكلمة “كل” لما نيجي نقول “لكل إنسان مدني الحق في عدم التعرض للقتل”، من غير أصل وفصل وماعدا… كل إنسان مدني وبس، من غير استثنائات ضد أي إنسان بسبب الجنس، اللون، العرق، اللغة، الجنسية، الحالة الاجتماعية أو غيره من الاختلافات. بالإضافة لذلك، يجب عدم التمييز ضد إنسان لأسباب سياسية أو قضائية أو الوضع الدولي للبلد أر المنطقة اللي بينتمي ليها الإنسان ده، بغض النظر عن كونها مستقلة أو معترف بها أو تحت حكم ذاتي أو تحت أي قيود أخرى بخصوص استقلاليتها. كل ده موجود في المادة الثانية لإعلان حقوق الإنسان.

التزامك بجملة “لكل إنسان مدني الحق في عدم التعرض للقتل” مش معناها على الإطلاق موافقتك على آراء وطريقة تفكير ومعتقدات كل شخص موجود على الكوكب. احنا كبشر دايماً عندنا آراء مختلفة في كل تفصيلة صغيرة في حياتنا، مفيش تفصيلة صغيرة في حياتنا هتلاقي إن كل الناس في الدنيا مجتمعين وموافقين عليها. عشان كده لما تتكلم وتطلب وتدافع عن حق أي إنسان مدني في عدم التعرض للقتل، انت بالتبعية بتتحول لإنك تكون إنسان أفضل وأقوى، لإنك قدرت تسمو وتترفع عن اختلافتكم الفكرية في قضايا جوهرية، مقابل حق الشخص التاني ده في الحياة وإنه ميتقتلش.

على فكرة، “الحق في الحياة وعدم التعرض للقتل لكل إنسان مدني” ده مبدأ بيتم تطبيقه في أي وقت حتى في وقت الحرب، وده مش كلامي ده طبقاً لاتفاقية جنيف الدولية اللي بتحدد القواعد والأسس الدولية في التعامل مع الحالات الإنسانية في وقت الحروب (٥).

الخلاصة:

خليك دايماً ثابت في موقفك في إنقاذ حياة كل إنسان مدني، في أي وقت وأي مكان وتحت أي ظروف، بغض النظر عن اسمه ولا لونه ولا دينه ولا أي اعتبارات تانية. الدفاع عن حق الاخرين في الحياة مش معناه موافقتك لأفكارهم ولا تأييدك لمبادئهم، دفاعك عن عدم تعرضهم للقتل ده بيخليك أنت إنسان أفضل، عندك روح إنسانية أسمى، وده بيفيدك ويفيد عيلتك ويفيد المجتمع اللي حواليك. افتكر دايماً إن الدنيا دوارة، واللي بتعمله وتقوله انهاردة، هيتردلك بكرة.

المصادر والمراجع:

١- الإعلان العالمي لحقوق الإنسان

Universal Declaration of Human Rights | الأمم المتحدة

٢- تاريخ إعلان حقوق الإنسان

تاريخ الإعلان | الأمم المتحدة (un.org)

٣- ضحايا ووفيات الحرب العالمية الثانية

Defense Casualty Analysis System (osd.mil)

٤- تعريف كلمة مدني في قاموس أكسفورد الانجليزي

https://www.oxfordlearnersdictionaries.com/definition/english/civilian_1

٥- اتفاقية جنيف بشأن حماية الأشخاص المدنيين وقت الحرب

اتفاقية جنيف بشأن حماية الأشخاص المدنيين في وقت الحرب المؤرخة في 12آب/أغسطس 1949 | OHCHR