كلامنا انهاردة على لو حد عنده انترفيو شركة. وبعد ما اتكلمنا على متطلبات الوظيفة في المقالة دي: انترفيو شركة ؟ الجزء الأول: متطلبات الوظيفة – كل مرحلة ليها مفرداتها وتوجهاتها – اتعلمت إيه؟
هنتكلم دلوقتي على ازاي المفروض تذاكر كويس الشركة اللي رايحلها وتدور وتعرف معلومات كتير عنها قبل ماتروح… اوعى تروح الانترفيو وتبتدي تسألهم بيعملوا ايه ومنتجاتهم وتاريخهم. ساعتها هتبقى زي عاطف في فيلم الناظر لما نزل الشارع ومش مدرك لأي حاجة حواليه وفي ملكوت مع نفسه تماماً. افتكر إن محدش بيعين عاطف اللي بالشكل ده…
*عشان نبقى متفقين، أنا من اللي مقتنعين إن فيلم الناظر ده فيه تلت إفيهات العالم. فمعلش هتستحملوني شوية في إننا هنجيب منه مواقف كتيرة بعد كده 🙂
ليه أذاكر قبل ما اروح أي انترفيو؟
طب الأول نفهم ليه لازم أدور كتير على الشركة وأذاكر قبل ما اروح. مش برضه أنا اللي رايح عشان هم يسألوني حاجات في الشغلانة ويشوفوا أنفع ولا لأ؟ الكلام ده مضبوط طبعاً ولازم نزود عليه إنك لازم توضح اهتمامك بالانترفيو وانك بتحترم المكان اللي انت رايحله ومقدر الفرصة اللي جاتلك ان تعمل انترفيو معاهم, وده بيبان في كلامك عن الشركة، والأهم بقى ان ده هيخليك جاهز اكتر لما تتكلم عن ازاي هتقدر تضيف للشركة في المجالات اللي هم مركزين فيها أو انك كشخص بتتماشى مع القيم الأساسية بالنسبة ليهم في طريقة الشغل… الجزء الخاص بإنك ازاي تستخدم المعلومات دي في كلامك جوة الانترفيو نفسه هنتكلم عنه في مقالة لاحقة.
ازاي أذاكر قبل ماروح أي انترفيو؟
هيساعدنا انهاردة في موضوع المذاكرة: “بيرون كلارك” مؤسس موقع Career Sidekick اللي اتأسس سنة ٢٠١٣ وده فيه مقالات ونصائح كتيرة عن الانترفيو… عجبتني هناك مقالة How to Research a Company for an Interview: 10 Steps | Career Sidekick بيتكلموا فيها عن ١٠ خطوات تعملهم وانت بتذاكر قبل الانترفيو، هنتكلم على كام أهم كام نقطة من وجهة نظري في التحضير:
١- ادخل على الموقع الرسمي للشركة، سواء المحلي أو العالمي، وهتلاقي عليه كل مايخص الشركة من تاريخ نشأتها وابتديت فين، لمنتجاتها وخططها في النمو والتوسع وازاي هم شايفين المستقبل إلى قيمهم ومبادئهم والأنشطة اللي بيعملوها للموظفين…
وده هيطمنك انت شخصياً على انها شركة ليها توجه وتاريخ ومستقرة وانك هتحس انت ملائم لبيئة العمل هناك ولا لأ، ومن ناحية تانية هيدعمك بالمعلومات عن خططهم؛ يعني مثلاً لو رايح انترفيو في شركة عربيات وروحت قلتلهم: أنا مش مقتنع بموضوع العربيات الكهرباء ده،كلام فاضي وصعب اوي يحصل ومش هو ده اللي هينقذ الكوكب ——ويطلع مثلاً إنهم على موقعهم الرسمي قايلين إن من ضمن أولوياتهم التحول للعربيات الكهربا؛ حضرتك متخيل موقفك هيبقى ايه!
٢- دور على Google على اخر أخبار الشركة دي بالأخص أو المجال اللي هي شغالة فيه والشركات المنافسة ليها عامة: وده هيخليك قادر تتكلم بصورة أكبر عن السوق نفسه وتوجاته الفترة دي وتأثير أي وضع اقتصادي، محلي أو عالمي، على وضع السوق عامة أو الشركة اللي بتقدم فيها خاصة.
٣- ادخل على صفحة ال Facebook الخاص بالشركة أو الماركات التابعة ليها: ده هيخليك تبقى متابع ايه أخر الحملات الدعائية اللي هم بيعملوها دلوقتي، وهيعكسلك توجهاتهم وتركيزهم الفترة دي وهيخليك عارف تتكلم عن حاجات ممكن متكونش عارفها عن الشركة، لإن مش شرط إنك تكون المستخدم الرئيسي للمنتج أو الخدمة اللي بيبيعوها، يعني مثلاً ممكن تبقى رايح تقدم في شركة أكل أطفال وانت مفيش جواز لسه، فساعتها طبيعي انك مش هتبقى عارف عن الحملات الدعائية للشركة دي حاجة من غير لما تدور.
٤- اعرف أكتر عن الشخص اللي هيعملك أو هتعملك الانترفيو: حاول تعرف أسمه أو أسمها، ادخل على صفحة اللينكد ان الخاصة بيهم LinkedIn: Log In or Sign Up ، بص كده على تاريخهم سواء في الشركة دي أو في حته تانية، ممكن تلاقي ان فيه اهتمامات أو خبرات مشتركة، وممكن تلاقي إن فيه ناس انت تعرفهم اشتغلوا معاه أو معاها قبل كده، فتقدر تكلمهم تسألهم عن طريقة الشغل الأحسن معاهم ولو فيه نقط وخبرات معينة بيكونوا بيدوروا عليها. خلي بالك انك متزودهاش وتبتدي تدور بزيادة وتتدخل في حاجات شخصية وتبقى فضولي، ساعتها حضرتك مش هتبقى بتدور على شغل، ده هيبقى تدوير على جوازة!
الخلاصة:
مهم أوي قبل ماتروح انترفيو شركة ما، انك تكون مذاكر وعامل اللي عليك، عشان ثقتك في نفسك تبقى أعلى وعندك معلومات تتكلم على أساسها واللي قدامك هيشوف ده ويحترمه عشان انت مقدر المكان والوقت اللي انت فيه معاهم، استخدم الموقع الرسمي للشركةوجوجل وفيسبوك ولينكد ان، كلها وسائل هتساعدك جداً في جمع معلومات
فاضل حاجة تاني كده في مرحلة ما قبل الانترفيو؟