في حب ال كومفورت زون ! ريح شوية

كل اللي بنسمعه عن ال كومفورت زون كلام يخليك تخاف منها، وتبعد عنها وتهرب منها، ولو فضلت فيها هتبقى بتقضي على نفسك ومستقبلك! ايه الرعب ده، اللي هو بالراحة ياجماعة، كفاية ضغط ضغط ضغط، الناس مش ناقصة… محتاجين نعرف إن التوازن طبقاً لأولويات كل شخص مهم جداً عشان البني آدم ميقعش من طوله لما يحاول يعمل كل حاجة في نفس الوقت، مش سوبر مان هو! ده حتى سوبر مان كان جوة كومفورت زون في الشغل بتاعه الصبح.

هنشوف مع بعض ايه هي ال كومفورت زون دي (منطقة الراحة) وإيه مميزات البقاء جواها وإيه عواقبها، وهنتكلم على قصة صياد السمك المكسيكي، اللي ممكن تغير كتير عن مفهومك للحياة كلها !

ايه بقى ال كومفورت زون دي؟

ترجمتها بالعربي: منطقة الراحة، ودي بتتقال على نطاق الحاجات اللي انت بتعملها بسهولة ومن غير تعب ولا قلق ولا مخاطرة وبتبقى مستريح جواها. تعريف كومفورت زون بالشكل ده يخليك عايز تعد جواها باقي حياتك كلها، بس لازم تبقى فاهم عواقب انك تفضل تعمل الحاجة اللي انت كويس فيها وخلاص من غير ماتعمل مجهود اضافي انك تتعلم حاجة جديدة وتوسع مدارك فكرك وقدراتك (١).

العواقب بتاعة إنك تفضل جوة كومفورت زون في حاجة معينة هي إنك ببساطة هتفضل محلك سر، مش هتتطور ولا تتحسن ولاتحقق حاجة أكتر من اللي انت فيها دلوقتي، يعني هتشترى راحة بالك على حساب طموحك ونجاحك. ومفيش حاجة اسمها إن الشخص ده جوة كومفورت زون أو برة منطقة الراحة في كل حاجة في حياته، وهو ده التوازن اللي مهم نوصل ليه عشان منقعش من طولنا من الضغوطات.

مثال ١: ممكن شخص يبقى في شغله بيتطور وبيتعلم حاجات جديدة وبيخرج برة كومفورت زون شغله بشكل عنيف، لكنه في علاقاته مع أصدقائه مبسوط مع ال٤ ولا ٥ أفراد اللي أصحابه من أيام الجامعة، ومش فارق معاه إنه يوسع دايرة معارفه ويبقى عنده شلة في كل مكان ويبقى مش ملاحق على الخروجات بينهم. الشخص ده اختار يطلع برة كومفورت زون الشغل ويكسر القيود، وفي نفس الوقت اختار إنه يفضل جوة كومفورت زون الصحاب.

مثال ٢: واحدة لقيت إن بنتها بتحب المزيكا جداً، والأم صفر على الشمال في الموضوع ده، بس قررت عشان بنتها إنها تطلع برة كومفورت زون هوايتها واهتمامتها وتتعلم أكتر في الموضوع ده. في نفس الوقت، الأم دي مبسوطة بإنها بتلعب رياضة مرة ولا اتنين بس في الأسبوع، ومش فارق معاها إنها تطور أكتر في الرياضة وتدخل مسابقات وتبقى بطلة الجمهورية، هي اختارت كده.

ريح شوية في ال كومفورت زون

زي ما فيه حاجات لازم نطلع فيها برة حدود منطقة الراحة ونخرج برة كومفورت زون المجال ده، زي ما فيه حاجات لازم نفضل جوة ال كومفورت زون بتاعتنا فيها ونستريح شوية، ماهو مش كله ضرب ضرب، سيبوا للناس مجال تشم نفسها. اعتبر ياسيدي اللجوء والبقاء في ال كومفورت زون في بعض المجالات كأنه استراحة محارب في وسط المعركة…

معظم الناس فعلاً بتحارب في مجالات مختلفة في حياتها، ومش شرط تكون نفس حروبك. مشاكل وصعوبات الشخص مش شرط تكون مادية بس وخلاص؛ وهكمل الشهر ازاي بعد ما المرتب خلص في أول ١٠ أيام بعد مانزل (متقلقش انت مش لوحدك في المشكلة دي، ناس كتيرة معاك ومن مختلف الطبقات).

المشاكل النفسية ساعات بتبقى أقوى وأصعب على الشخص من تأثير المشاكل المادية. ممكن يبقى فيه مشاكل مع العيلة، مشاكل مع الصحاب، مشاكل في التعامل مع الناس في الشغل. ممكن تبقى مشاكل متجيش في بالك أساساً؛ زي إن بنت تنزل تجيب حاجة من أخر الشارع وتعرضها لمضايقات ومعاكسات في الرايحة والجاية، ده لوحده بيحط ضغوطات كبيرة عليها. وممكن مشاكل مع النفس، وده الأصعب كمان؛ صراعات داخلية وأفكار متضاربة محيراك جواك. كل دي مشاكل برة الفلوس وصعبة جداً.

أولويات الحياة واختيار البقاء في كومفورت زون

لأول بس عايز اوضح أنا ليه مصمم على استخدام كلمة “عواقب” إنك تفضل جوة كومفورت زون وليس كلمة عيوب، لإن أنت ممكن تقرر وتختار كده بإرادتك، سواء لفترة معينة في حياتك أو في مجالات محددة. بمعنى مش لازم إنك تكسر القيود وتتحدى نفسك وتبقى نمبر وان في كل حاجة، بتختار أولوياتك في الحياة، وده اللي هنشوفه في القصة دي (٢):

المحادثة دي على أحد شواطئ المكسيك بين صياد سمك من أهل البلد وزائر من أمريكا، كان شغال مستثمر في بنك.. كان صياد السمك قاعد في مركب صغير فيه كام واحدة من سمك التونة, كبير في الحجم لسه الصياد مصطاده طازة:

–المستثمر: السمك ده شكله مميز، بقالك وقت قد ايه بتصطاد فيه؟
-الصياد: وقت مش كتير
-المستثمر: طب ليه مقعدتش وقت أكتر تصطاد وجبت سمك أكتر؟
-الصياد: عندي اللي يكفيني أنا وأسرتي للاحتياجات الأساسية
-المستثمر: ايوا، بس بتعمل ايه في باقي وقتك؟

-الصياد: بصحى براحتي، بصطاد وقت قليل، بلعب مع ولادي، بريح وانام شوية كمان في وسط اليوم واقضي وقت مع مراتي، بروح القرية بليل واقابل صحابي وبعزف على الجيتار وبناكل ونغني ونتبسط، عندي حياة زحمة مليانة حاجات كتير.

-المستثمر: أنا خريج جامعة هارفرد ومعايا دراسات عليا في إدارة الأعمال وأقدر أساعدك بخطة عمل. انت تقدر تعد وقت أكتر تصطاد، والعائد الاضافي من الصيد يخليك تجيب مركب أكبر وتصطاد كميات أكبر وتجيب أسطول مراكب بالعائد ده، وبعدها تبيع للمصانع مباشرة، من غير مايبقى فيه وسيط في النص، فتكسب فلوس أكتر، ومع الوقت هتقدر تفتح مصنع خاص بيك والمصانع تكبر وتسيب القرية الصغيرة دي وتروح المدينة (مكسيكو سيتي) وبعدها لوس انجلوس في أمريكا وبعدها نيويورك عشان تكون مالك لبيزنس كبير اوي.

–الصياد: الخطة دي تاخد وقت قد ايه عشان تكمل؟
-المستثمر: من ١٥ ل ٢٠ سنة
-الصياد: طب وبعد كده، ايه اللي يحصل؟
-المستثمر: لما توصل لحجم مبيعات كبير جداً، تقدر تطرح شركتك في البورصة وتكسب ملايين الدولارات.
-الصياد: وبعد ما اكسب ملايين الدولارات، ايه اللي هيحصل؟

-المستثمر: ساعتها تقدر تعتزل الشغل وتروح تعد في قرية ساحلية صغيرة وتقضي وقتك في مركب صغير تصطاد وتصحى براحتك وتلعب مع أولادك وتقضي وقت مع مراتك وبليل تروح القرية تعزف جيتار وتعد مع اصحابك وتتبسطوا وتسهروا.

تفتكروا الصياد المكسيكي سمع نصيحة المستثمر الامريكي ولف اللفة دي كلها وقعد ١٥ ولا ٢٠ سنة يشتغل عشان في الاخر يوصل إنه يقضي الوقت زي ماهو بيعمل دلوقتي؟

مفيش صح وغلط بين الاتجاهين، هو على حسب أولوياته، ممكن يختار يفضل جوة كومفورت زون المرحلة الحالية في حياته ويقضي الوقت وهو مبسوط. وممكن يختار إنه يخرج برة ال كومفورت زون لو أولوياته إنه يتطور ويثبت نفسه ويطلع برة القرية. كل قرار وليه مميزاته وعواقبه، كل حاجة على حسب أولوياتك.

*طريقة عيش الصياد المكسيكي دي شبه أهالي المناطق الزرقاء اللي بتتميز بطولة العمر اللي كنا اتكلمنا عليهم قبل كده (٣).

الخلاصة:

عرفنا مع بعض إن ممكن مكانك من كومفورت زون شغلك يختلف عن منطقة الراحة الخاصة بأولادك أو رياضتك. كل حاجة وانت بتختار عايز تبقى فين من كومفورت زون المجال ده، تبقى مستريح وبتشتري راحة بالك ولا حابب تنجح أكتر وتحقق طموحك وحلمك بتعب ومجهود زيادة. المهم يبقى فيه توازن، زي مافيه حاجات بتسعى فيها، يبقى فيه حاجات بستريح فيها عشان تقدر تكمل… كل حاجة ليها مميزاتها وعواقبها، وزي ماشفنا في قصة الصياد المكسيكي، انت اللي بتختار مكانك في أي كومفورت زون على حسب أولوياتك في المجال ده.

المصادر والمراجع:

١- تعريف الكومفورت زون
https://en.wikipedia.org/wiki/Comfort_zone

٢- قصة الصياد المكسيكي

٣- المناطق الزرقاء من اتعلمت ايه
https://et3alemteh.com/?p=337