المناطق الزرقاء في العالم! الجزء الخامس

كل لما بتكلم مع حد عن المعمرين في المناطق الزرقاء اللي بيعيشوا متوسط أعمار أكبر من باقي سكان العالم ويتميزوا كمان بمعدلات سعادة عالية، الناس بتفتكر إن أكلهم وأسلوبهم في الأكل هو العامل الوحيد أو الأقوى اللي الدراسات والأبحاث حددته، بس الحقيقة إن فيه عامل في نفس الأهمية لومكانش أهم كمان؛ وهو تواصلهم مع الناس اللي حواليهم؛ من خلال علاقاتهم الاجتماعية والأصدقاء ودايرة تعاملاتهم، حتى لو مش صحاب قريبين ليهم، لكن الناس اللي بنتعامل معاهم بشكل دوري من حارس عقار ولا حد من الأمن ولا بياع في محل ولا الجيران ولا حتى سواق الأتوبيس اللي بتركب معاه.

قبل ماندخل في الموضوع؛ ده لينك لمقالة الأكل عند الناس دي، ومن أحب المقالات ليا لأهميتها الكبيرة  المناطق الزرقاء في العالم للسعادةوطول العمر! الجزء الرابع: الأكل – المعدة بيت الداء – اتعلمت إيه؟

“دان باتنر”، الباحث والكاتب المسئول عن دراسة المناطق الزرقاء الخمسة بيتكلم في الفيديو ده، في الدقيقة ١٨، عن إن التواصل مع الاخرين هو الأساس لكل العوامل اللي اتكلمنا عنها قبل كده لسكان المناطق الزرقاء (الحركة، الهدف في الحياة، الأكل)

أقسام التواصل مع الأاخرين في المناطق الزرقاء:

“دان” وضح كمان في اكتر من فيديو ومقالة المقصود بالتواصل مع الاخرين وقسم العامل ده لثلاث أجزاء:

١- الأسرة: وبطبيعة الحال دي أكتر فئة الشخص في المناطق الزرقاء بيهتم بيها بحكم القرب منهم والمسئولية. حتى لو مش عايشين في نفس البيت، بس بيبقى فيه تواصل مباشر بشكل دائم وبيتقابلوا ويقضوا وقت كبير مع بعض، مش مجرد يتكلموا في التليفون ولا يبعتوا واتساب ولا تلاقي الأب وهو قاعد مع عياله مشغول بالتليفون ولا الأم بتتفرج على التليفزيون وسايبه عيالها…

الحياة فيها مشاغل كتير، ولو أسرتك مش في أولوياتك، بالفعل مش بالكلام، يبقى أنت عندك مشكلة كبيرة وهتندم على الوقت اللي ضيعته ده لما تلاقيهم مش موجودين حواليك، سواء عشان حد فيهم اتوفى أو بقى عنده أولويات تانية غير الأسرة، وماتلومش غير نفسك عشان ساعتها الابن أو الابنة هيبقوا اتعلموا ده منك.

٢- الانتماء لمجموعة: المقصود هنا مجموعة دينية أو اتباع مذهب أو أفكار أو معتقدات روحية وإيمانية معينة مع أشخاص تانيين. طبعاً بنتكلم هنا على ناس من مناطق مختلفة من العالم بأديان ومعتقدات مختلفة تماماً عن بعض، لكن المشترك كان إنهم بيمارسوا شعائرهم وتقاليدهم الروحية دي بمتوسط ٤ مرات في الشهر، وهنا بنتكلم على ممارسة التقاليد دي مع مجموعة في إطار من النشاط الاجتماعي اللي بيبقى فيه تواصل مع بعض، مش مجرد حد بيقوم بالشعائر دي في بيته لوحده في انعزال عن باقي الناس.

٣- الأصدقاء: والكلام في النقطة دي بالأخص على جودة ونوع وعادات وأنشطة الصحاب دول، مش مجرد بتقضوا وقت قد ايه مع بعض، فلازم يكون مفهومكم عن الأنشطة الاجتماعية يكون إيجابي، مش كل الوقت اللي بتقضيه ده تكون بتأذي نفسك. متفهمش غلط إن حياتهم نكد وجد ومقضينها ندوات علمية واجتماعات سياسية، بالعكس لما تشوف سكان المناطق الزرقاء دول هتلاقي معظم  الفيديوهات بتاعتهم مع بعض كلها ضحك وكلام وحكاوي وأنشطة سواء ألعاب بسيطة زي الشطرنج والطاولة أو أنشطة فيها حركة وأعمال تطوعية. بالإضافة لنوعيات الأكل الصحية اللي بتبقى قدامهم وهم بياكلوا وبيستمتعوا بالأكل عشان بيبقى الهدف إنهم يعدوا مع بعض والأكل ده حاجة إضافية، مش متجمعين في الأصل عشان الأكل، والقعدة مع بعض هي الحاجة الزيادة…

فيه دراسة أثبتت إن لو ٣ من أصدقائك بيعانوا من السمنة (الوزن الزائد)، فيه فرصة أكبر ب٥٠٪؜ إنك أنت كمان توصل لمرحلة الوزن الزائد دي، بسبب تأثيرهم عليك والأنشطة اللي بتعملوها مع بعض، اللي طبعاً بيبقى جزء منها الأكل بشكل غير سليم. 

الشعور بالوحدة بيزود نسبة الموت بحوالي ٣٠٪؜ ! 

والكلام ده مش بس للكبار، لكن الصغيرين في السن كمان، ومش شرط يبقى حد عايش لوحده عشان يبقى وحيد بس ممكني بقى معاه ناس أو متجوز حتى بس من جواه هو مش مستريح ومبسوط ومش حاسس بالانتماء لأي مجموعة حواليه…

الكلام ده مش أحاسيس وعواطف، دي دراسات علمية أثبتت فعلاً تأثير الإحساس بالوحدة على صحة الإنسان النفسية والبدنية (خلي بالك قالوا الإحساس بالوحدة، مش إنك تبقى عايش لوحدك). كتير من اللي بيشعروا بالوحدة بيصيبهم الاكتئاب والأرق ومعدل توتر وقلق عالي، وده بيأثر على عضلة القلب ومستوى الضغط والجهاز المناعي.

ده لينك لأحد المقالات اللي بتتناول الدراسات دي:

Why Do Lonely People Die Younger? – Keck Medicine of USC

الخلاصة:

مفيش حاجة بتطول العمر وتخلينا نعيش مبسوطين زي تواصلنا مع بعض واهتمامنا بأسرتنا وإننا نكون جزء من مجموعة وبنعمل أنشطة ونصاحب الناس اللي تأثيرهم علينا إيجابي. ومش شرط مفهومنا عن التواصل يقتصر بس على الأسرة والصحاب القريبين لكن دايرة معارفنا وتعاملاتنا مع الناس بشكل دوري في حياتنا.

ده لينك الموقع بتاع الدراسة عن المناطق الزرقاء في العالم للسكان الأطول عمراً والأكثر سعادة، للي حابب يقرا أكتر أو يعمل الاختبار بتاعهم عن عاداتك اليومية مقارنة بسكان المناطق الزرقاء وايه اللي ممكن تعدله في حياتك

Blue Zones—Live Better, Longer