أحسن, أحسن من الأحسن! الاستمرارية تكسب الكمية

موضوع المقالة هو سر من أسرار النجاح لأي حد وفي أي مجال: الاستمرارية والالتزام في إنك تعمل خطوات بتتكرر كل شوية، حتى لو صغيرة… كلامنا مش هيبقى فلسفي وشوية نظريات isمن كتب وخلاص. بالعكس هنشوف على مدار كذا مقالة؛ أمثلة لناس كتير ناجحة كانوا ومازالوا عندهم حتة الاستمرارية دي عالية اوي. هنتكلم برضه على ازاي نقدر نطبق الاستمرارية في الحاجات المهمة في حياتنا.

فيه طبعاً مجموعة كبيرة من الكتب بتتكلم على الموضوع ده، هناخد مقتطفات من بعضهم زي: كتاب العادات الذرية لجيمس كلير، كتاب العادات السبع لستيفن كوفي، كتاب الصباح المعجزة لهال ايرلود… ده غير إننا هنوضح نظرية الربع ساعة اللي ممكن تشقلبلك حياتك لو نفذتها وفرقت معايا شخصياً جداً.

الاستمرارية ومين اللي أحسن من مين؟!

نبدأ شوية بتوضيح عنوان المقالة الملخبط ده، لما بنقول: أحسن، أحسن من الأحسن:

• أول أحسن هي إنك تتطور واحدة واحدة وتبقى ماشي بخطوات مستمرة في إنك تبقى أفضل وتتحسن في الحاجة اللي انت مركز فيها دي.
• تاني أحسن هي إن حاجة تبقى أفضل من حاجة.
• تالت واحدة اللي هي الأحسن، المقصود بيها إنك تعمل أفضل مجهود عندك وتجيب أخرك في حاجة وتحقق مكسب كبير بس على المدى القصير، ومتقدرش تستمر عليه.

يعني جملة “أحسن | أحسن من | الأحسن” كلها يبقى معناها:
تطورك باستمرار | أفضل ليك من | إنك تحقق مكسب كبير بس قصير المدى.

الاستمرارية في حياتنا اليومية

الفكرة دي انت بتتعرض ليها علطول وموجودة حواليك، بس يمكن مفكرتش تربط الحاجات دي بمبدأ الاستمرارية، وده اللي هنركز عليه في مقالة انهاردة بشكل كبير وهنكمل باقي العناصر حوالين فكرة الاستمرارية في المقالات الجاية.

الاستمرارية في القصص الطفولية

معظمنا عارف من وإحنا صغيرين قصة الأرنب والسلحفاة… في القصة دي السلحفاة (المعروفة ببطئها) كانت بتتمرن لسباق الجري ضد الأرنب وبتتحسن في أدائها باستمرار كل شوية. الناحية التانية الأرنب اللي معروف بسرعته، اعتمد بس على سمعته وإنه الأفضل ورقم ١ في مجاله ومتمرنش وماستعدش خالص للسباق ده. ولما جيه يوم السباق الأرنب قعد يتباهى بقدراته ويتريق على السلحفاة ويقولها مهما اتمرنتي وحاولتي مش هتسبقيني. لكن في السباق نفسه، غرور الأرنب خلاه يقرر إنه ممكن يستريح وينام شوية في وسط السباق لإنه أكيد أسرع من السلحفاة، لكن اللي حصل إنه راحت عليه نومة والسلحفاة فضلت تحاول وتستمر وتمشي في السباق خطوة بخطوة لحد ماكسبت الأرنب اللي صحي متأخر وحاول يقدم أفضل مجهود عنده لكن مكانش كفاية.

رغم إنها تبان قصة هزلية، لكن هي أثبتت مبدأ؛ أحسن، أحسن من الأحسن! —> خطوات بسيطة مستمرة من السلحفاة، خليتها أفضل من المجهود الكبير اللي الأرنب حاول يعمله بعد ماصحي متأخر.

الاستمرارية في الأنشطة الرياضية

هتدخل أي جيم (صالة ألعاب بدنية) ولا مكان تدريب كروس فيت ولا جري ولا أي رياضة هتلاقي عبارات شبه بعض عن إنك لازم تكمل ومتوقفش. معظم العبارات دي عن الاستمرارية وتأثيرها الايجابي عليك وتطورك في التمرين وفي الرياضة اللي بتمارسها. العبارات دي مش مجرد جعجعة وكلام في الهوا. دي دراسات وعلم عن ازاي تأثير التمرين المستمر أفضل من التدريب على فترات متقطعة بشكل أعنف في التمرينة الواحدة (١).

فيه مقولة بتتقال في رياضة الجري في الموضوع ده: “لو جريت قليل مش هتتحسن، لو جريت زيادة هتتصاب”… بمعنى, لو انت مثلاً متوسط المسافة اللي بتجري فيها في المرة الواحدة هي ٢ كيلومتر (حوالي خمس لفات حوالين التراك)، دي متوسط المسافة يعني ساعات بتجري ١ كيلو وساعات بتجري ٣ كيلو… والمدرب طالب منك تجري الأسبوع ده ١٢ كيلومتر في اجمالي الاسبوع; هتقسم المسافة دي على أربع أو خمس مرات في الأسبوع بمتوسط ٣ كيلومتر في التمرينة الواحدة، وده الصح عشان يبقى فيه زيادة تدريجية مع الاستمرارية في التحسن.

لكن لو انت قررت تقسم المسافة اللي الكابتن طالبها منك على مرتين بس، يعني هتعمل ٦ كيلومتر في المرة الواحدة، يعني ٣ أضعاف متوسط المسافة اللي انت متعود عليها، يبقي حضرتك هتتصاب وانت بتجري من كتر مابتحمل جسمك قدرة هو مش جاهز ليها. ولو قرصت على نفسك جامد وكملت ال٦ كيلومتر كلهم، هتعد باقي الاسبوع في وجع وألم شديد وأكيد مش هتقدر تحري التمرينة التانية اللي عندك بعد كام يوم…

من الاخر التدريج والاستمرارية أضمن وأفضل ليك من العافية وفردة الصدر، عشان هتيجي على دماغك.

الاستمرارية في عاداتنا الصحية

الأكل والدايت

ناخد موضوع الاستمرارية من ناحية الأكل الصحي والدايت، اللي الأبحاث بتقول إن على الأقل ٨٠٪؜ من اللي بيخسوا مع الدايت بيرجعوا يزيدوا الوزن اللي خسروه تاني، فيما يعرف بنظرية اليويو (٢). وفي أغلب الأحوال السبب في كده إن الناس بتروح لسكة الدايت العنيف وتعمل أحسن ماعندها من تنظيم أكل ورياضة، لكن لفترة مؤقتة وغير مستمرة، سواء بقى عشان فرح بنت خالتي والفستان يقفل عليا، ولا عشان فورمة الساحل وطلعة الصيف ولا غيره من الأسباب المؤقتة اللي مبتخليش فيه الاستمرارية المطلوبة لتحقيق نتيجة مستمرة.

إن الواحد يحاول يغير من أسلوب حياته وعاداته في الأكل ولا الحركة والرياضة بما يتناسب مع ظروفه، هيخلي فيه تغيير أفضل ودائم أكتر على المدى البعيد، لإن الاستمرارية في التغيير ده هتخليك بعد فترة واصل لنتيجة أفضل ١٠٠ مرة من إنك تبقى زي اليويو، طالع نازل كل شوية. وموضوع إنك أفضل ١٠٠ مرة ده الحد الأدنى، لإننا هنتكلم في المقالات الجاية عن المعادلة الموجودة في كتاب العادات الذرية.

التدخين

لو اعتبرنا إن فيه شخص بيشرب متوسط ١٠ سجاير في اليوم، يعني ٧٠ سيجارة في الاسبوع. الشخص ده عايز يبطل سجاير، هتنصحه يقلل السجاير تديرجياً بشكل دوري، حتى لو الموضوع أخد وقت؟ ولا هتقوله بطل سجاير خالص خمس أيام في الاسبوع واشرب يومين حتى لو هتشرب ٢٥ سيجارة في اليوم؟ لإن بالورقة والقلم انت خليته ينزل من ٧٠ سيجارة في الاسبوع ل٥٠ سيجارة!

لو روحت مع الاختيار التاني هتبقى فاكر انك انت كده عملت اللي عليك وضبطته جامد، بس الحقيقة إنك هتبقى لبسته ودبسته وهتخليه يرجع يشرب سجاير بشكل أكبر، لإنك بطريقة الحرمان المفاجئ هتخلي جسمه مش قادر يتقبل ده، بالعكس ده ممكن يرجع يشرب متوسط يومي أكبر عشان انت عرفته على سكة ال٢٥ سيجارة في اليوم! لازم تمشي على مبدأ الاستمرارية في التقليل بشكل تدريجي عشان توصل لنتيجة.

الاستمرارية في النقطة اللي فاتت دي كلها هنلاقيها مشتركة ومتكررة في أسلوب حياة الناس في المناطق الزرقاء المشهورين بأنهم أكثر الأماكن سعادة في العالم وأطولهم في متوسط الأعمار. كنا اتكلمنا في كذا مقالة عنهم قبل كده واللينك في الأخر في قسم المصادر والمراجع.

الخلاصة:

الاستمرارية في التطور والتقدم حتى لو بنسبة بسيطة بيوصلك لنتيجة أكبر بكتير من التطور الكبير المفاجئ الغير مستمر. وده معنى جملة: أحسن، أحسن من الأحسن! شوفنا أمثلة من حياتنا اليومية انهاردة على الموضوع ده، سواء من قصص طفولية، أو حياتنا الرياضية، أو عادتنا الصحية. هنكمل في المقالات الجاية في الموضوع ده باستدلال أكبر من بعض الكتب والنماذج الناجحة.

المصادر والمراجع:

١- مقالة عن تكرار مرات الجري والاستمرارية فيه لنتيجة أفضل
https://marathonhandbook.com/how-many-days-a-week-should-i-run/#:~:text=You%20should%20run%20at%20least,energy%2Defficient%20and%20stronger%20runner.

٢- مقالة عن نظرية اليويو ي الأكل وأهمية الاستمرارية في النظام الغائي
https://health.clevelandclinic.org/why-people-diet-lose-weight-and-gain-it-all-back/

٣- المناطق الزرقاء المشهورة بالسعادة وطول العمر – من اتعلمت ايه
https://et3alemteh.com/?cat=47