نصائح للحياة من كتاب وصايا – الجزء الثاني

هنكمل كلامنا انهاردة عن كتاب وصايا للكاتب محمد الرطيان (١) واللي كنا اتكلمنا في الجزء الأول من السلسلة دي عن ٤ من النصائح المهمة الموجودة فيه، لينك المقالة السابقة في اخر المقالة دي (٢). الكاتب كان بدأ الكتاب بأهمية القراية كأول نصيحة بيقدمها لأولاده، في رأيي الشخصي دي كمان من أهم النصائح في الكتاب لإن القراية فعلاً بتغير طريقة تفكير الشخص وتعاملاته مع الناس ومستوى معرفته وعلمه.

بعد كده اتكلمنا عن أهمية الابتسامة وازاي ان ضحكتك في وش غيرك بتفتحلك أبواب كتير مقفلة. الوصية اللي أخدناها برضه من كتاب وصايا كانت ليها علاقة بتحكمك في غضبك وازاي عصبيتك دي بتخسرك كتير. من ضمن الحاجات اللي كنا اتكلمنا عليها برضه الفرق بين الضحك والمرح من ناحية ويين الوقاحة والتريقة من ناحية تانية. هنكمل دلوقتي بنصائح جديدة من الكتاب.

ثبت مبادئك بس طور آلاتك وأدواتك

وصية الآلة من كتاب وصايا

الوصية: “لا تكن وفياً ل الآلة… خُنها مع آلة أحدث منها.”

زي ماشفنا، كتاب وصايا بيتكلم على مبادئ وقيم في التعامل بين البشر ثابته ومناسبة لكل زمان ومكان. بس يجي الكاتب في الوصية دي ويقولنا إن الأدوات والوسائل والآلات اللي بنستخدمها للتواصل وتطبيق المبادئ دي، لازم ميكونوش ثابتين ويكونوا بيتغيروا من زمن للتاني. كل شوية فيه تطوير وتغيير بصورة أسرع بكتير من ما احنا متخيلين.

المقصود في الوصية دي إنك متقفلش دماغك وترفض مواكبة التكنولوجيا والتحديث والتطوير اللي بيحصل حوالينا بسرعة البرق. التحسين ده بنشوفه كل المجالات، سواء في ماكينات صناعية ولا أدوات طبية ولا وسائل تواصل ولا دراسة ولا الكترونيات ولا غيره وغيره في كل حاجة حوالينا.

اقتراحات لخيانة الآلة

أكيد فيه جزء ايجابي كبير في عصر التكنولوجيا اللي احنا عايشين فيه، استخدمه واتخلى عن طرقك القديمة اللي ممكن تكون كويسة لكن الادوات الجديدة اكثر فاعلية. يعني ممكن مثلاً بدل ماتعد تكتب ملاحظاتك في المحاضرات ولا الاجتماعات على ورقة، وبعد كده تنقلها على الكمبيوتر عشان تحافظ عليها, ممكن تستخدم التليفون اللي في ايدك واكتب عليه مرة واحدة الملاحظات عشان تكسب وقت، وبالمرة توفر ورق للبيئة.

ممكن برضه بدل ما كنت بتعتمد على معرفتك بشوارع المنطقة ومواعيد الزحمة عشان تعرف تمشي منين، استخدم تطبيقات ال GPS اللي بتشوف الطرق عن طريق الستالايت وبتقولك بشكل مباشر اللي بيحصل فعلاً، مش مجرد توقعات.

انا اعرف ناس بيبقى عندهم وقت كبير في المواصلات، فبيستغلوا التطبيقات اللي على الموبيل أو التابلت اللي معاهم إنهم يقروا كتب ولايتابعوا الاخبار ولايشوفوا افلام وثائقية ولا يذاكروا كورسات من عليه. ده فيه ناس بيحضروا مؤتمرات علمية وثقافية اونلاين بتتعمل في بلاد تانية خالص.

التكنولوجيا موجودة حوالينا في كل حاجة واحنا اللي في ايدينا نستغلها بشكل ايجابي ونتطور في ادائنا واستغلالنا للتكنولوجيا.

تدريب ستيفن كوفي في كتاب وصايا

الوصية: “عند موتك: أنت لا تستطيع اختيار الطقس المناسب لكي يحضر أكبر عدد ممكن من الناس إلى جنازتك! ماتفعله في حياتك: هو الذي سيجعلهم يحضرون إلى جنازتك مهما كان الطقس سيئاً!”

أبويا – الله يرحمه – كان دايماً يقولي مفيش أهم من معاملاتك مع الناس، هو ده اللي باقي… وهو ده اللي بيقوله الكاتب هنا في كتاب وصايا لما بيتكلم عن ان كل شخص تتعامل معاه لازم تحاول يكون في احترام بينكم. مبنتكلمش على أصحابك القريبين اللي بتخرج وتتفسح وتسافر معاهم، بنتكلم على تعاملاتك مع كل حد بتشوفه وبتقابله.

ستيفن كوفي في كتابه الشهير: “العادات السبع للناس الأكثر فاعلية” بيتكلم على أهمية تصورك ل جنازتك وتتخيل ايه اللي هيحصل يوميها ومين هيبقى موجود وهيقولوا ايه عليك (٣). الفكرة مش إنك تفول على نفسك ولا حاجة، بس يمكن ده يكون جرس تنبيه ليك لإن كل حاجة انت بتعملها جوة حياتك دلوقتي هي اللي هتفرق معاك بعد كده، وتخطط أفضل لايه اللي انت عايز توصله.

ومحدش يفتكر إنه بعيد عن اليوم ده، بص حواليك واتعظ من كمية الناس اللي بتتوفى فجأة وهم صغيرين. عيش حياتك من دلوقتي وانت في بالك اليوم ده وانت هتلاقي كل الناس اللي انت كنت محترم في التعامل معاهم فاكرينك وموجودين معاك ساعتها وبيفتكروك بالخير وبيدعولك، ودي أكتر حاجة ممكن تكون محتاجها ساعتها.

ابعد عن المسكنات والحلول اللي من على الوش

الوصية: “اهرب من الحلول المؤقتة. هل سمعت بمشكلة: حلها مشكلة أخرى؟!”

كتاب وصايا بيقولك كفاية مسكنات في حياتنا وحلول غير فعالة من غير حل المشكلة من جذرها. هترضى بحل مؤقت وتقول تمام كده، الموضوع هيتلصم شوية، وبعد كده يلف ويرجع على دماغك تاني وبشكل أقوى.

لو مشكلة كبيرة بتقابلك في الشغل ولا مع صحابك ولا في حياتك الشخصية، متهربش منها ولا تتجنبها ولا تحاول تعمل مش شايفها وترضى بحل مؤقت. الموضوع لو فعلاً كبير ومهم ومضايقك، يبقى روح حله بشكل سليم وروح لأصل المشكلة واتحرك في الاتجاه اللي يحلها بشكل دائم ويرضي كل الاطراف اللي في الحوار…

أنا هنا مش بسخنك عشان تروح تضرب حد ولا تستقيل من شغلك ولا تسيب صحابك، اهدى بس كده وفكر كويس عشان كل الحلول دي تعتبر حلول مؤقته، لو محطتش ايدك على أصل المشكلة، اللي ممكن في الاخر تطلع عندك انت أساساً.

الكلام اللي في كتاب وصايا ده هو اللي بيتقال في الشركات الكبيرة في مجال ادارة الاعمال، وبيتقال من مستشارين عالميين متخصصين في تنمية وتطوير الافراد. زي ما “كريج بروسر” مطور الافراد العالمي بيقول: “الحلول المؤقتة في الأغلب بتتحول لمشاكل دائمة” (٤).

المصادر والمراجع:

١- معلومات عن محمد الرطيان كاتب كتاب وصايا

https://ar.wikipedia.org/wiki/%D9%85%D8%AD%D9%85%D8%AF_%D8%A7%D9%84%D8%B1%D8%B7%D9%8A%D8%A7%D9%86

٢- مقالة الجزء الاول من اتعلمت ايه عن كتاب وصايا

نصائح للحياة من كتاب وصايا – الجزء الأول – اتعلمت إيه؟

٣- تدريب تصور الجنازة لستيفن كوفي

الحياة الأكثر فاعلية لستيفن كوفي | صحيفة الاقتصادية

٤- من هو كريج بروس

https://www.linkedin.com/in/craig-bruce-54401442