في الجزء الثالث والأخير من سلسلة نصائح للحياة من كتاب وصايا هنتكلم على ٤ وصايا يخصوا كل واحد فينا، مهما كانت اهتماماتك. في اخر المقالة دي هنسيب لينك للجزء الأول والثاني من السلسة دي (١).
كنا اتكلمنا في الجزء الأول عن أهمية القراية، أهمية الضحكة، أهمية الهدوء وقت الغضب، أهمية التفرقة بين الصراحة والوقاحة. أما في الجزء الثاني ناقشنا التطور المستمر وناقشنا التعامل مع الناس وناقشنا فكرة الحلول الجذرية.
ساعد عشان تتساعد، وافتح طريق للاسعاف
الوصية: “سئ هذا الذي لا يتوقف عند الحادث ليُقدم المساعدة الممكنة… والأكثر سوءاً هو ذاك الذي يتوقف عند الحادث… ليتفرج!”
الكلام هنا في كتاب وصايا عن مساعدة الناس اللي عندهم مشكلة في حادثة، بس أنا حابب اخد المبدأ نفسه بصورة أكبر. مش لازم حادثة عشان تساعد الناس، كل يوم بتجيلك فرص عشان تساعد غيرك؛ زي إنك تساعد حد كبير يعدي الشارع، ولا تفضل فاتح باب الاسانسير لحد عشان يلحقه، ولا تساعد حد لو شفته شايل حاجات كتيرة… أنا مقتنع إن الموضوع رايح جاي، وده عن تجربة، اللي بيساعد غيره ربنا هيوقفله في طريقه اللي يساعده بعد كده، واللي هيعمل عبيط ويقول أنا مالي، هيحتاس لوحده لما يحتاج مساعدة.
أما بالنسبة للجزء الثاني في الوصية، بخصوص الناس اللي بتقف عند الحادثة تتفرج، دول معندهمش أي إحساس بالمسئولية. أصل اللي بيتفرج ده بيزود في زحمة تعطل عربية إسعاف بتحاول تلحق حياة المصابين في الحادثة، أو على أقل تقدير بتزود في زحمة تعطل الناس عن مشاغلها ومصالحها. وايوا النص دقيقة اللي هتتفرج فيها دي هتعطل الدنيا، عشان نص دقيقة من عندك على نص دقيقة من اللي وراك نلاقي الدنيا عطلت خالص.
كتاب وصايا وكتاب العقلية (عقلية النمو)
الوصية: “لايوجد إنسان في هذه الحياة إلا ويواجه الفشل في أمر ما. ولكن… هل تعلم -يابني- ماهو الفشل العظيم؟ أن تفشل في تجاوز الفشل.”
تعالوا نتفق إن مفيش حد مثالي، ولا إن فيه حد مبيغلطش. بالعكس انت كل لما تقرا في السيرة الذاتية لناس عظماء غيروا في التاريخ تلاقيهم بيعترفوا بكمية غلطات عملوها وفخورين بكده، عشان الأهم انهم اتعلموا من الغلطات دي وبقوا أفضل بسببها، ودي اسمها عقلية النمو. أكيد هنتكلم في مقالة مخصوص عن كتاب “عقلية النمو” عشان ده من أهم الكتب اللي ممكن حد يقراها في مجال تطوير النفس وطريقة التفكير ورؤيتك للأمور (٢).
عشان بس نبقى متفقين، الكاتب هنا في كتاب وصايا مش بيدعوك إنك تكرر نفس الغلطة كل شوية، دي دعوة إنك متخافش إنك تغلط غلطات جديدة، عشان تتعلم وتتطور لازم تجرب وتحاول.
التعامل مع أستاذ: أنا عارف كل حاجة
الوصية: “احذر من هؤلاء الذين يظنون أنهم يمتلكون الحقيقة وحدهم. هؤلاء لايتحملون أي رأي مخالف لهم… ولن يترددوا بوميك بأبشع التُهم!”
تعالوا نتفق إن كل واحد فينا أكيد يعرف حد من اللي فاكرين نفسهم جوجل في نفسهم وعندهم إجابات لكل حاجة وإن مفيش حد فاهم زيهم وإن كلامهم بس اللي صح وأي حد تاني يقول حاجة عكسهم يبقى غلطان! معلش سخنت شوية، بس الوصية دي من كتاب وصايا فكرتني بشخص ما عنده الصفات دي، وبجد التعامل معاه وإقناعه بوجهة نظر مختلفة بيتطلب مجهود جبار.
في التعامل مع الناس دي لازم تبقى مرتب أفكارك كويس اوي قبل ماتتكلم معاهم وتحاول تقنعهم بحاجة، ولازم كلامك يبقى مبني على حقائق واضحة مفيش خلاف عليها. ساعتها هيبتدوا يتكلموا معاك بحقائق هم كمان وكلام مُقنع، وكده انت هتبقى شفت وجهة نظرهم واتعلمت حاجة جديدة، أو هيسكتوا خلاص ومش هيردوا عليك، وساعتها تبقى انت اثبت وجهة نظرك خلاص.
طبعاً الأسهل إنك تشتري دماغك ومتدخلش معاهم في حوارات، لكن ده مش واقعي لإنهم أفراد موجودين حوالينا في كل حته وساعات ظروف العيلة ولا الدراسة ولا الشغل بتجبرنا على التعامل والنقاش معاهم.
كتاب وصايا وكتاب العادات الذرية
الوصية: “كن منُظَّماً، وأحسن إدارة وقتك كما يجب. لاتجعل اليوم يمضي دون أن تفعل شيئاً مفيداً. دع الكسالى ينظرون إليك ويظنون أن يومك ٣٦ ساعة!”
الوصية دي من كتاب وصايا مهمة اوي لإن تحديد هدف لليوم شئ أساسي عشان اليوم ميهربش منك ويضيع من غير فايدة. ده غير إنك هتحس بالانجاز والتقدم بشكل يومي، مش هتستنى لما تعمل حاجة كبيرة اوي عشان تحس بالفخر، هتقدر تبقى فخور بنفسك كل يوم بانجازات بسيطة.
مهم اوي إنك تبسط الموضوع على نفسك، احنا هنا بتكلم على اهداف بسيطة، زي مثلاً إنك هتقضي نص ساعة مع أهلك من غير ماتمسك الموبيل، أو هتقرا ٤ صفحات من كتاب، أو هتروح تلعب رياضة لمدة ساعة.
كفاية اوي في اليوم هدف ولا اتنين من الاهداف الصغيرة المحددة الواضحة دي، المهم بس إنك تحافظ على وضع الاهداف دي وتحقيقها كل يوم. الالتزام بالخطوات الصغيرة هو اللي بيحقق التأثير الكبير، زي ماتكلمنا عن كتاب العادات الذرية قبل كده، وهنسيب لينك المقالة في الاخر تحت (٣).
المصادر والمراجع:
١- نصائح للحياة من كتاب وصايا – الجزء الأول
نصائح للحياة من كتاب وصايا – الجزء الأول – اتعلمت إيه؟ (et3alemteh.com)
نصائح للحياة من كتاب وصايا – الجزء الثاني
٢- ملخص كتاب العقلية (عقلية النمو)
٣- دروس عن الاستمرارية من كتاب العادات الذرية
٧ دروس عن الاستمرارية من كتاب العادات الذرية – اتعلمت إيه؟ (et3alemteh.com)