لو دخلت على Google ودورت على اسئلة الانترفيو المتوقعة عامة او اسئلة انترفيو شركة ص ولا ض خاصة؛ هتلاقي صفحات كتيرة واجابات نموذجية وتفصيلية. بس سألت نفسك كام واحد غيرك من اللي مقدمين على الانترفيو عمل زيك وقعد يدور ويقرا من كذا حته عشان يدخل يقول اللي حفظه لما يروح الانترفيو؟
طبعاً دي حاجة ايجابية انك تكون محضر ومذاكر قبل ماتروح، بس اللي يخليك تفرق وتتميز عن غيرك هو انك تمشي ورا كلام سعيد صالح. في مسرحية مدرسة المشاغبين قال: فين السؤال… أنا أحط ايدي على السؤال تلاقيني فوريرة… طبعاً الكلام هنا على أسئلة المهارات الشخصية، مفيش حاجة على الأسئلة التقنية زي الأسئلة الهندسية أو المعادلات الرياضية أو حاجة علمية.
١- اسمع كويس في انترفيو الشركة:
مش كل لما تتسأل سؤال تروح طالع زي القطر ورادد بسرعة وكأنه سؤال في برنامج العباقرة (ده لينك صفحتهم للي ميعرفهمش) Facebook وعايز تلحق قبل ماحد يسبقك. خد نفسك واسمع كويس ولو فيه كلمة مش متأكد انك سمعتها صح؛ اطلب من اللي قدامك يعيدالسؤال للتوضيح.
حصلت قبل كده مع شخص كان رايح يقدم في شركة لسه صغيرة واتسأل: انت شايفنا فين كمان ٥ سنين؟ هو عشان مبرمج نفسه على الأسئلة المعتادة اللي على النت سمع السؤال: انت شايفك (شايف نفسك) فين كمان ٥ سنين؟ وابتدى يجاوب ويوضح خططه عن نفسه وطموحاته وأماله، لحد ماخلص خلص واللي كان بيعمله الانترفيو قاله: كل كلامك ده حلو اوي بس مش ده السؤال اللي انا سألته وانصحك تركز كويس قبل ماتندفع. وفي الاخر ماتاخدش في الشغلانة دي.
٢- لعبة التوصيل والاجابة على أسئلة انترفيو الشركة:
فاكر لعبة التوصيل اللي كنا بنلعبها واحنا صغيرين، هنكررها تاني: هات ورقة ولا اكسيل شيت على الكمبيوتر اكتب في ناحية: خبراتك السابقة في الشغل أو في الجامعة ومهاراتك الحالية والكورسات اللي اخدتها والكتب اللي قريتها، وقدامها الناحية التانية متطلبات الوظيفة اللي اعلنه عنها. بالإضافة للمعلومات اللي انت جمعتها عن الشركة زي ما اتكلمنا في المقالة دي انترفيو شركة ؟ الجزء الثاني: محدش بيشغل عاطف– ذاكر كويس قبل ماتروح – اتعلمت إيه؟ .
وبعد كده وصلهم ببعض، شوف الحاجات الموجودة عندك اللي تتناسب مع اهتمامتهم ومتطلباتهم وايه اللي مش موجود عندك وتبقى عارف انه نقطة تطوير. دي من أهم الخطوات في إنك تكون محضر للانترفيو. لإن ده هيخليك عارف ايه اللي محتاج تركز عليه وتفتكر ومواقف حصلت ليك قبل كده وتضخم أهميتها وتوضح دورك فيها وتفتكر تفاصيلها وتبقى هي محور كلامك. وطبعاً بالحق وباللي حصل فعلاً، بلاش تفتي وتهبد وتحورعشان لو سألوا عليك حد كان معاك في الموقف ده متلاقيش نفسك ضيعت خالص + إن اللي بيزودها أوي؛ بيبان عليه أوي، بيبقى مثلاً هو دوره الأصلي أو منصبه يكون بيمثل ١٠٪ من حجم المشروع ودوره حيوي ومهم، بس هو يضخم ويزود لحد مايحسس اللي قدامه انه كان رئيس مجلس ادارةالشركة؛ فبلاش أفورة (للي مش فاهم، أفورة جاية من over أو الزيادة).
ومتقلقش مش لازم يبقى عندك أمثلة أو مواقف لكل النقط الي موجودة في ناحية الشركة ومتطلبات الوظيفة(هي دي نقط التطوير بتاعة سؤال ايه نقط ضعفك) انت مش سوبر مان/ سوبرومان، وهم عارفين انهم مش هيلاقوا الشخص اللي فيه كل حاجة؛ وبنفس المنطق مش لازم كل الخبرات اللي عندك تكون ليها علاقة بمتطلبات الوظيفة دي وتحاول تخترع قصة عشان تلاقي لحاجة قبل كده علاقة بالشغلانة، فتبوظ منك خالص النقطة دي.
٣- خليك مختلف في انترفيو الشركة:
الناس في الشركة اللي بيعملوا الانترفيو (سواء موارد بشرية أو أي تخصص تاني) بقوا خلاص عارفين الإجابات النموذجية المحفوظةاللي موجودة على النت، هم هيتبسطوا بإن حد يبقى مذاكر ويقولهم الكلام المثالي، بس برضه هم بيدوروا على حد مميز يشغل مخه معاهم وتكون خبرته ومهاراته مختلفة عن التانيين؛ وعشان توصلهم انك انت الشخص ده لازم تكون فاهم هم بيدوروا على ايه في الشغلانة(راحعالمقالة دي: انترفيو شركة ؟ الجزء الأول: متطلبات الوظيفة – كل مرحلة ليها مفرداتها وتوجهاتها – اتعلمت إيه؟ ) وتفكر هو السؤال اللي بيتسأل ده وراه ايه و عايزين يوصلوا بيه لإيه، وساعتها هتعرف تعدل وتقيف اجابتك على المعنى اللي انت عايز توصلوا ليهم…
يعني مثلاً لو جالك سؤال من نوعية: ممكن تعرف نفسك؟ ليه ممكن نعينك معانا؟ ايه نقاط القوة اللي شايفها في نفسك؟ هتضيف ايه للفريق بتاعنا؟ دي أسئلة من النوع المفتوح اللي بتدي للشخص المجال يتكلم ويستفيض ويفرد عضلات مهاراته الشخصية، وساعتها تستخدم النتيجة بتاعة لعبة التوصيل اللي عملتها والمواقف والخبرات المناسبة اللي وصلتها بمتطلبات الوظيفة وتوجهات الشركة. وأكيد ده أفضل من إجابة الروبوت بتاعة؛ هقدملكم الالتزام ووقتي ومجهودي وتركيزي وهسمع التوجيهات الي هتطلب مني.
الخلاصة:
عشان تتميز لازم تقدم في انترفيو الشركة حاجة مختلفة عن غيرك وعن الكلام المحفوظ من عالنت، وتسمع كويس السؤال وتحدد ايه اللي وراه وهم عايزين يفهموا ايه بالضبط، واتأكد انك سامع السؤال كويس. متنساش توصل خبراتك ومهاراتك بمتطلبات واحتياجات الشغلانة عشان تعرف تركز على ايه ومتضيعش وقت في حاجات مش هتفيد في الانترفيو بل بالعكس هتضر كمان.
قولولنا ايه أكتر اسئلة بتحيركوا وبتشوفوها صعبة في الانترفيو عشان نتكلم عليها أكتر؟