المناطق الزرقاء في العالم! الجزء الرابع

بعد ما اتكلمنا في موضوع نظري المرة اللي فاتت عن سكان المناطق الزرقاء في مقالة: المناطق الزرقاء في العالم للسعادة وطول العمر! الجزء الثالث: الإيكيجاي – هدفك في الحياة – اتعلمت إيه؟

هنتكلم انهاردة عن موضوع محسوس وملموس ومأكول ومشروب، وهو أنواع وطرق الأكل المشتركة بين سكان المناطق الزرقاء.

موضوع الأكل ده من أكتر المواضيع اللي ممكن أفضل اتكلم فيها كتير، عشان قعدت أجرب فيه سنين وسنين وطرق أكل مختلفة.

للتوضيح بس: أنا قصدي قعدت أجرب فيه ازاي الأكل يبقى صحي أكتر ومريح للمعدة ويساعد في الصحة والرياضة والشكل والإحساس العام.

مش قصة خالص إني ذواقة ولا بدخل المطبخ أعمل ألذ وأشهى الأكلات، ده أنا خيبة خالص في الطبيخ، ربنا يخلي مراتي وقبلها أمي هم اللي ماسكين قسم التغذية عندنا 🙂

الفيديو الكارثي:

وأنا بدور على أنواع وطرق أكل سكان المناطق الزرقاء، الفيديو الكارثي ده وقع قدامي بالصدفة. 

بقول على الفيديو كارثي (حتى لو كوميدي) عشان بيوصل رسالة غلط تماماً إن الأكل الصحي تأثيره بس إن الواحد يخس، وإن الواحد بيخس بس عشان خاطر الناس تمدحه. ده مجرد جزء من صورة أكبر وأهم وأشمل من موضوع إن حد يقولي برافو عشان خسيت. وخلينا نقول شوية آثار للأكل الصحي، وهبدأ بالآثار النفسية الأول عشان أرد على الفيديو:

١- النشاط: إنك تبقى حاسس إنك خفيف وقادر تتحرك وعندك طاقة تروح وتيجي وتتكلم أو تعمل حاجة غير القعدة على الكنبة متنح قدام التليفزيون. ده لوحده سبب كبير جداً إنك تبقى عايز تاكل صحي لإنه بيأثر على مستوى نشاطك وإنتاجيتك في الحاجات اللي بتشتغلها وبتنجزها في حياتك عامة.

٢- الصحة النفسية: كلمة منتشرة جداً دلوقتي وممكن متبقاش متخيل إن الأكل بيأثر عليها وعلى ثقتك في نفسك. بس لما تبقى بتتحرك وبتنجز وتحس إنك عندك نمط أكل معين وواعي لطريقة أكلك وقدرتك في التحكم في نفسك وتتقدر تقول لأ لحاجات ممكن تضرك، ساعتها بتحس بالإنجاز وإنك من جواك قوي وبتبقى شخص أحسن، عشان كده ثقتك في نفسك بتزيد. أنت بتعمل كل ده عشان خاطر منظرك قدام نفسك، ومش قصدي هنا المنظر الخارجي والوزن والشكل بس، لكن الأهم منظرك قدام نفسك إنك قوي داخلياً وبتختار اللي يفيدك.

٣- أداء الجسم: هو الواحد هيعيش كام مرة؟ هي مرة واحدة بس، فنحاول نعيشها صح بجسم سليم، وهنا مبتكلمش على الوزن أو الشكل الخارجي، لكن على أعضاء الجسم ووظائفه وحواسه؛ زي البشرة والسنان والعضلات والشعر  والنظر والعضم وغيرهم وغيرهم. كل حاجة موجودة في جسمك بتتأثر وممكن تبقى أقوى ويتحسن أدائها بأنواع معينة في الأكل بيبقى معروف فايدته وتأثيره.

٤- البعد عن الأمراض المزمنة: الجسم زي العربية، لو حطيت بنزين مغشوش وجودته قليلة هيأثر على أداء العربية على المدى البعيد ومعدل استهلاكها هيبقى أسرع وهتحتاج علاج وصيانة بشكل دوري وتكاليف عالية وممكن حاجات تتصلح وممكن حاجات لأ… في الأخر العربية ممكن تغيرها، لكن الجسم ملوش قطع غيار، فلازم نحافظ عليه. الأمراض المزمنة دي زي القلب والضغط والسكر والكوليسترول، وكلها طبعاً أمراض ممكن تؤدي إلى الوفاة لا قدر الله.

بعد ماعرفنا فوائد الأكل الصحي، عايزين نعرف ايه بقى هو الأكل اللي بياكلوه في المناطق الزرقاء واللي ساعدهم كمان في إنه يزود سنين لمتوسط أعمارهم. وخلو بالكوا إحنا هنتكلم على نمط وأسلوب أكل بشكل عام، مستمر معاهم معظم حياتهم، مش نظام ريجيم معمول عشان فرح بنت خالتي الشهر اللي جاي وبعد كده نرجع تاني زي الأول… أنواع وأسلوب الأكل مش واحدة في كل المناطق وبتختلف طبقاً للطبيعة الجغرافية (زي مثلاً لو مدينة ساحلية) والخلفية الثقافية.

العوامل المشتركة في الأكل بين سكان المناطق الزرقاء:

١- نظام نباتي نسبياً: كلهم بيعتمدوا على نظام نباتي في الأساس بتاع أكلهم، ده مش معناه إنهم كلهم مانعين لحوم وفراخ وأسماك؛ فيه شعوب مانعة وفيه شعوب لأ، بس اللي بياكلها منهم بتكون بنسب قليلة جداً مقارنة بالخضار والفاكهة والأكل اللي مصدره من الأرض واللي بيشكل القاعدة الأكبر في نظام أكلهم… وده بيرجع لكمية المعادن والفيتامينات اللي موجودة في الخضار والفاكهة والبقوليات والحبوب والمكسرات اللي بتتطلع من الأرض، ومعظمها بيكون بسعرات حرارية قليلة وسريع الهضم على المعدة.

٢- أكل طبيعي كامل: المقصود هنا إنهم بيقللوا جداً أو تقريباً مفيش أكل مُصَنع في علب وأكياس من اللي بنجيبهم من البقالات، وطبعاً بيبعدوا عن الزيوت المهدرجة والإضافات الصناعية ومحليات الأكل والسكر ومكسبات الطعم وكل الكوارث دي. بص على ظهر علبة أي حاجة من الحاجات المصنعة اللي بنجيبها من البقالات وشوف كميات المكونات اللي محطوطة عشان تدي طعم غير حقيقي للأكل وطبعاً تبقى أرخص للشركة اللي بتصنع وتزود الربح… عشان نبسطها، اعتبر إنهم بيجيبوا أكلهم من السوق اللي فيه خضار وفاكهة وحاجات طبيعية مش من الرفوف والتلاجات اللي مليانة ماركات وإعلانات وأكل مصنوع بشكل ممكن في بعض الأوقات يضر، حتى لو بيتم تسويقه كأنه أكل صحي وهو من جوة كارثة برضه (حتى لو كارثة أقل من أنواع تانية) 

٣- كميات على قد الاحتياج: كل شعب وليه طريقته في السيطرة على الكميات عشان ميوصلش لمرحلة الطفاسة اللي بنعملها، وبيتجلى منظرها في العزايم والأفراح. فيه شعوب بتحط الأكل في أطباق صغيرة وبيبجبوا معالق وشوك صغيرة عشان يقللوا الكميات. فيه شعوب تانية بتحط الأكل على ترابيزة بعيدة واللي عايز يجيب أكل تاني يقوم ويتمشى يحط في طبقة، وده يخليك متقومش غير لما تبقى فعلاً جعان، وبيدي الجسم وقت إنه يهضم لإن العقل بيحتاج حوالي ٢٠ دقيقة بعد مايبطل أكل عشان يحس بإنه شبعان. لكن لو فضلت شغال في الأكلكله ورا بعضه الجسم مش هيلحق ياخد نفسه ولايوصل رسالة للعقل إنه شبع.

٤- نشاط اجتماعي: الأكل بالنسبة ليهم مش مجرد وجبة سريعة يدخلوها جوة جسمهم ويجروا، لكن لحظة للتواصل والقعدة والدردشة. بيتبسطوا في فكرة الغداء أو العشاء مع بعض وبياكلوا على مراحل وبيوقفوا أكل في النص عشان يتكلموا، وده بيدي وقت أفضل للهضم وياكلوا كميات أقل ويوقفوا أكل لما يشبعوا، ميبقاش سباق زي عندنا إننا نخلص كل الأكل في أسرع وقت.

الخلاصة:

الناس دي مبتاكلش أكل غريب ولا بيشربوا اكسير الحياة، بياكلوا أكل عادي بس بشكل صحي أساسه الأكل النباتي، وبكميات مناسبة على قد احتياجهم، وبالنسبة ليهم الأكل بيبقى فرصة للقعدة الحلوة والدردشة. وده بيأثر بشكل إيجابي على صحتهم وجسمهم وتجنبهم لأمراض كتيرة.