المناطق الزرقاء في العالم! الجزء الثالث 

انهاردة هنتكلم على تاني الصفات المشتركة بين سكان المناطق الزرقاء في العالم وهي إيجاد هدفك في الحياة وإتباعه وإيمانهم إن ده ممكن يزود سنين لحياتك ويخليك مبسوط أكتر. طبعاً أول صفة مشتركة اتكلمنا عليها قبل كده كانت الحركة الطبيعية في اليوم والنشاط البدني:

المناطق الزرقاء في العالم للسعادة وطول العمر! الجزء الثاني: في الحركة بركة – اتعلمت إيه؟

زي ماتفقنا قبل كده، فيه خمس مناطق زرقاء في العالم، والصفة المشتركة دي هي: الهدف في الحياة، وأسمها بيختلف من منطقة للتانية، بس أشهر بلد في فلسفة إيجاد الهدف في الحياة هي اليابان 🇯🇵 وبيسموا الموضوع ده: إيكيجاي – اللي هو باللغة اليابانية معناه: سبب الوجود…

والفكرة دي مبتبقاش مربوطة بالسن الكبير بس، لكن بيبقى في رحلتهم في الحياة من بدري، مش بيستنوا لحد لما يبقوا فوق ال٩٠ سنة وبعد كده بيدوروا عليه…

ولما بيكبروا في السن بيبقى هدفهم في الحياة أبسط طبعاً، زي إحدى سيدات اليابان اللي عندها ١٠٢ سنة، بتتكلم على إن هدفها دلوقتي إنها تقضي وقت مع حفيدة حفيدتها اللي أصغر منها ب١٠٠ سنة 😃 

الايكيجاي في أحد المناطق الزرقاء:

الإيكيجاي هو النقطة المشتركة في إجاباتك عن أربع أسئلة بتوصلك للنقطة اللي تبقى محدد فيها سبب وجودك أو هدفك في الحياة أو إيمانك الداخلي إنك مخلوق عشان الحاجة دي بالذات وكأن حياتك كلها بتترتب عشان تمشي في الاتجاه ده أو كأنك بتتحضر لحاجة معينة.

تعالى نشوف مع بعض الأسئلة دي، ونجرب تدريب بسيط عليها؛ اكتب في ورقة أو على الكمبيوتر  إجابات كل سؤال في ورقة لوحدها:

١- ايه هي الحاجة اللي بتحب تعملها؟

في الرد على السؤال ده، متزنقش تفكيرك في شغلانتك الحالية أو مجال دراستك، رد على السؤال ده بشكل تلقائي من غير تفكير كتير. ممكن تكون بتحب التدريس، الرسم، الكتابة، الهندسة، الرياضة، اللعب مع الأطفال…

٢– ايه هي الحاجة اللي بتعملها بشكل كويس؟

جاوب في ورقة تانية، ومتربطش إجابة السؤال ده بالسؤال اللي قبله، خليك مركز في السؤال ده على الحاجات اللي أنت متميز فيها وبتتقنها جداً. يعني ممكن واحد يكون بيحب الرسم، بس مبيرسمش حلو، وفي نفس الوقت يكون دكتور أسنان شاطر.

٣– ايه هي الحاجة اللي بتعملها وممكن حد يديلك مقابل مادي عليها؟

استحملني معلش وخليك في ورقة تالته، هنا بقى تقدر تفكر في الوظائف المعتادين عليها، حتى لو دي مش شغلانتك الحالية. بس ممكن واحد يكون شغلانته إنه مهندس ويكون بيكتب أشعار برضه وكمان بيلعب رياضة زي الاسكواش، في الحالة دي هتبقى إجابته الأولى: مهندس وإجابته الثانية: شاعر وإجابته التالته مدرب اسكواش . دول كلهم وظائف ممكن ياخد عليهم أجر.

٤– ايه هي الحاجة اللي المجتمع أو العالم محتاجها دلوقتي؟

أخر ورقة وأخر سؤال، من غير برضه ماترجع لإجابات الأسئلة اللي قبل كده. مش شرط الإجابة تكون حاجة أنت بتعملها حالياً. الإجابة هنا بتبقى ليها علاقة برؤيتك لأولويات إصلاح العالم أو المجتمع حواليك. تعالى نبسطها: ممكن يبقى حد شايف إن احترام الناس لبعضهم وتعاملهم هو أهم حاجة، واحد تاني شايف إن الطلبة يتعلموا صح، واحد تالت يبقى شايف إن محتاجين نحل المشاكل البيئية، واحد رابع شايف الوضع الصحي، واحد خامس شايف محتاجين إبداع وإبتكار وحاجات شكلها جمالي أكتر عشان نحسن نفسية الناس. السؤال ده بالذات إجاباته كتير أوي، عشان كده مهم تكتب فعلاً الحاجات اللي شايفها أولوية من وجهة نظرك الشخصية.

هات ورقة خامسة فاضية وحطها في النص ووزع باقي  الأربع أسئلة بإجابتهم، بحيث إن السؤال الأول يبقى فوق، والتاني على الشمال، والتالت تحت، والرابع على اليمين، هيبقى عندك شكل شبه اللي في الصورة اللي تحت دي (طبعاً ممكن تعمل نفس الشكل ده على الكمبيوتر).

بص تاني على إجاباتك في الأربع ورقات، شوف الحاجات المشتركة، علم على الحاجات اللي شبه بعضها بلون مختلف أو حط تحتيها خط أو حطها في مربع. هتلاقي الصورة ابتديت توضح، وهتلاقي دماغك نورت كده وإن فيه حاجات متكررة… اكتب في الورقة الفاضية اللي في النص النتيجة اللي وصلتلها وهو ده هيبقى الايكيجاي الخاص بيك فيالوقت الحالي.

ملاحظة هامة:

الوصول للفكرة دي مش حاجة سهلة وممكن تاخد سنين من التفكير والتدوير ودماغك تودي وتجيب بين أفكار ومشاريع وكلام فلسفي وكلام عملي. وتعيد التدريب ده كذا مرة وتعد تغير فيه كل شوية.

 بس بجد عن تجربة الفكرة دي بتظهر وتوضح قدامك لما تاخد خطوة للوراء وتبص على حياتك كلها كأنها شريط فيلم، بتربط فيه أهم الأحداث اللي حصلتلك وتخليك تجاوب على الأسئلة دي، وتوصلها ببعضها لحد ماتلاقي العوامل المشتركة اللي هتخليك تعرف غايتك وهدفك ايه في الحياة، وده هيخليك تشوف حاجات كتير حواليك بمنظور تاني.

ممكن ناس تشوف إن ده كلام نظري بس الدراسات والتجارب والكتب في مجالات مختلفة أثبتت إن الكلام ده عملي وبيتطبق فعلاً وليه نتايج، وأثبتت أهمية إن يبقى كل شخص أو شركة أو مؤسسة ليهم هدف واضح بيسعوا لتحقيقه. الهدف ده مبيبقاش تحقيق فلوس وخلاص، الناس دي بتشوف الفلوس نتيجة بتحصل لما بيبقى عندهم الهدف واضح وبيدخلوه في حياتهم وبيفكروا بيها فيشغلهم وأسلوبهم في التعامل مع الاخرين.

العلاقة بين كتاب قلب العمل والمناطق الزرقاء:

كتاب “قلب العمل ❤️” اللي بيتكلم عن ازاي نقدر ندخل هدف الحياة وإفادة الأخرين في صميم الشغل عند أكبر الشركات في العالم. بعتبره من أعظم الكتب اللي الواحد قراها وأكيد هنتكلم عنه بشكل تفصيلي أكتر بعد كده، ده لينك عن الكتاب من جوجل

 the heart of business – Google Search

ومتقلقش، الإيكيجاي أوهدفك في الحياة أو سبب وجودك مش المفروض خالص إنه هيخليك تبعد عن إنك تحاول تشتغل وتعمل فلوس، اللي هي أداة ووسيلة مهمة في حياتنا أكيد. بالعكس ده أنت لما تحدد هدفك وتعرف تشوفوه جوة الشغل اللي بتعمله، هتلاقي نفسك بتنجح وبتطور وبتتحسن بشكل أفضل بكتير من قبل كده…

والكلام ده عن تجربة شخصية، لما شفت شغلانة المبيعات بتاعتي كفرصة إني أتواصل مع الناس بشكل أفضل وممكن أطور طريقة تعاملهم مع بعض وتطوير وتعليم لنفسي كمان، حسيت ساعتها إني بعمل حاجة أكبر من إني ببيع منتجات وخلاص، وده خلاني بحب شغلي أكتر وبتطور فيه وأكيد ده جابلي عائد مادي أكبر.

الخلاصة:

سواء استخدمت طريقة “الايكيجاي”اليابانية أو “البلان دي فيدا” الكوستاريكية، أو غيرها من الطرق؛ المهم إنك توصل لحاجة بتحركك، بتخليك تقوم كل يوم عايز تعمل شئ مختلف، مش مجرد نازل تلف في ساقية وكل يوم يسلم اللي بعده من غير ماتحس إنك عملت الحاجة اللي أنت شايفها مهمة بالنسبة ليك… وده من أهم الصفات المشتركة الموجودة بين سكان المناطق الزرقاء اللي كانوا بيستخدموها على مدار حياتهم لحد ماوصلوا إنهم أكثر المنطق سعادة وأكبرهم عمراً.