نادال وفيدرير, احترام متبادل ولا بكاء مزيف؟

مشهد اعتزال فيدرير وبكاء منافسه الأقوى نادال في اللحظة دي كان من أكتر الحاجات اللي مكنتش فاهم سببها. كنت متوقع إن نادال يكون فرحان إن هو لسه مكمل وعنده وقت أطول من منافسه عشان يعمل بطولات ويكتب تاريخ أقوى من غريمه في الفترة اللي جاية. مبقتش فاهم هو مستوى الاحترام المتبادل واصل بينهم للمرحلة دي فعلاً من المثالية ولا دي دموع التماسيح ونادال بيمثل قدام الكاميرات عشان يكسب تعاطف أكتر ودعم من الجماهير في الفترة اللي بعدها…

مين نادال وفيدرير دول أساساً؟

روجيه فيدرير (السويسري) ورفائل نادال (الأسباني) من أعظم لاعبي رياضة التنس الأرضي في التاريخ. منافستهم الشديدة على القمة بقالها أكتر من ١٧ سنة. فيدرير قرر يعتزل ولعب أخر ماتش ليه في سبتمبر ٢٠٢٢…
لو جمعنا ألقاب الجراند سلام (أقوى ٤ بطولات دولية للتنس) اللي نادال وفيدرير كسبوهم، يوصلوا ل ٤٢ لقب، وده رقم بيأكد على قد ايه هم عظماء في اللعبة دي. في المواجهات المباشرة؛ نادال كسب فيدرير ٢٤ ماتش مقابل ١٦ فوز لفيدرير على نادال، يعني لعبوا ضد بعض ٤٠ ماتش، يعني متوسط من مرتين لتلاته كل سنة، وده رقم كبير برضه (١)

على فكرة فيه ناس تانية لعبوا ضد بعض عدد ماتشات أكتر منهم، زي دجوكوفيتش (الصربي) اللي فيدرير لعب ضده عدد مرات أكتر من نادال. بس الندية والحماسة والتألق اللي كان بيحصل بين نادال وفيدرير كان بيخلي لماتشاتهم ضد بعض روح تانية خالص. خصوصاً إن كل واحد فيهم ليه أسلوبه المختلف تماماً في اللعب.
تقدر تقول إن دول الأهلي والزمالك بتوع التنس، البرازيل والأرجنتين، ريال مدريد وبرشلونة، كل واحد فيهم ند للتاني قوي أوي.

علاقة نادال وفيدرير عبر السنين

جوة الملعب:

رغم تنافسهم الشديد، لكن كل واحد فيهم ليه فضل على التاني في تطوير أدائه وطريقة لعبه. والاتنين ليهم فضل في تطوير شكل رياضة التنس عامة. توني نادال، اللي هو عم رافائل نادال ومدربه، بيأكد على ازاي وحود نادال بأسلوب مختلف وأداء قوي واستغلاله لنقط ضعف فيدرير في السابق، أجبر فيدرير إنه يطور نفسه ويغير من أسلوبه. ولما ده حصل، اظطر نادال هو كمان يواكب ويتطور ويرتقي بمستواه أكتر كمان عشان اللي كان محققله الفوز على فيدرير في الكام سنة اللي فاتت مابقاش بيكسبه دلوقتي.

برة الملعب:

وهنا بقى اللغز اللي بنتكلم عليه بيتحل، رغم اختلاف أسلوبهم في اللعب والمنافسة الشديدة بينهم، لكن عبر السنين كانوا بيحترموا بعض جداً. وكان عندهم مفاهيم وأهداف مشتركة بينهم:

١- نادال وفيدرير كانوا بيهتموا جداً بالأعمال الخيرية وترويجها وليهم أنشطة كتيرة خصوصاً في مجال الأطفال.

٢- كل واحد فيهم شايف إن حياته مش واقفة على إنه يبقى المصنف رقم ١ عالمياً في التنس، لكن شايفين إن فيه حاجات تانية أهم، زي أسرهم ودورهم المجتمعي (٢). (وبعد كده يجي واحد بيدرس ولا شغال في شركة يقولك شغلي ودراستي أهم من عيلتي!)

٣- بيتكلموا على بعض بشكل هايل، ومن سنين مش بس بعد الاعتزال. نادال مرة قال إن لو حد شايف إنه أحسن من فيدرير، يبقى ده شخص مبيفهمش في رياضة التنس. وفيدرير بيقول إن علاقته بنادال أقوى من باقي اللاعيبة عشان خاطر بيتقابلوا في ماتشات وحفلات عشاء وأعمال خيرية وهو يعرف أسرة نادال كويس.

أنا عارف إن التنس بيتقال عليه رياضة النبلاء، بس معقولة للدرجة دي؟ بصراحة الاتنين دول أثبته فعلاً أهمية الاحترام المتبادل في التعامل بين الناس، حتى لو بيتنافسوا.
ده إحنا بنتخانق مع بعض عشان فرق بنشجعها وإحنا قاعدين في البيت أساساً، مش مستفيدين حاجة!
*لا أدعي المثالية في النقطة دي خالص، كلنا مذنبين!

أسبوع وداع فيدرير ورسائل بينه وبين نادال والأخرين

• يوم ١٥ سبتمبر، قبل أخر ماتش لفيدرير بأسبوع، فيدرير نزل خطاب وداع مؤثر جداً على صفحته وخص جزء من الخطاب إنه يشكر فيه منافسيه اللي لعب معاهم بشرف ماتشات قوية وقدروا يعلوا بمستوى اللعبة عامة (٣).
• في أخر ماتش ليه في لندن في سبتمبر ٢٠٢٢، فيدرير كان بيلعب ماتش زوجي واختار إن زميله في الفريق يبقى نادال. رغم إن نادال كان عنده ظروف شخصية، واضطروا يغيروا ميعاد الماتش عشان يتأكدوا إن هو اللي هيبقى زميل فيدرير في أخر ماتش ليه (٤).
• في المؤتمر الصحفي قبل الماتش، نادال قال إن أهم لاعب تنس في مسيرته (فيدرير) هيعتزل، وقال إنه كان غريم ودود. وأكد: رغم إنهم كانوا بيتنافسوا على ألقاب مهمة جداً لكنه فاهم إن العلاقات الإنسانية هي الأبقى والأهم.
• في خطاب فيدرير الأخير بعد الماتش شكره نادال وباقي أساطير اللعبة اللي كانوا موجودين عشان يحيوه ويشكروه على اللي قدمه هو كمان للعبة.
• بكاء نادال وفيدرير بشدة بعد الماتش، لدرجة إن تحس إن فيدرير هو اللي بيواسي نادال. بجد الفيديو يستاهل الفرجة (٥).

الخلاصة:

بعد اللي اتقال ده كله وبعد ماشفنا التاريخ المحترم بينهم مينفعش نقول على بكاء نادال دموع تماسيح. من أهم دروس الرياضةهنا; إن مهما كانت المنافسة شديدة وقوية بينك وبين خصمك في الملعب أو في الشغل أو في الدراسة أو في شركة منافسة أو حتى في انتخابات اتحاد الطلبة، متنساش أهمية الاحترام المتبادل. تأثيره خصمك الإيجابي عليك أكبر وأعظم من إنك تخسر ماتش، خصمك ده هيخليك تطور وتتحسن وتحفز نفسك عشان تبقى أفضل. ممكن حد يفتكر إن الكلام ده شكله نظري، بس نادال وفيدرير أثبتوا لينا إنه واقع وممكن يحصل وكمان بين اتنين بيتنافسوا على قمة العالم في مجالهم.

المصادر والمراجع:

١- مقالة على موقع الجارديان عن المنافسة المبنية على الاحترام بين نادال وفيدرير
https://www.theguardian.com/sport/2022/oct/29/federer-v-nadal-a-great-sporting-rivalry-rooted-in-mutual-respect

٢- مقالة على موقع الجارديان بتتكلم عن حديث نادال عن فيدرير وقت الاعتزال
https://edition.cnn.com/2022/11/27/tennis/rafael-nadal-roger-federer-retirement-spt-intl/index.html

٣- بوست فيدرير على انستجرام اللي بيودع فيه الرياضة
https://www.instagram.com/p/Cih1g8prSOE/?igshid=YmMyMTA2M2Y=

٤- فيديو للمؤتمر الصحفي بين نادال وفيدرير قبل أخر ماتش لفيدرير

٥- فيديو لخطاب الوداع من فيدرير بعد الماتش الختامي وبكاء نادال

٥- مقالة متصلة بموضوع الاحترام المتبادل في حالة العداء الكيني إليود كيبشوجي
https://et3alemteh.com/?p=187#more-187