الاستعداد للدراسة أو الشغل في رمضان في ٣ خطوات

كلها كام يوم ويهل هلال شهر رمضان، كل سنة وأنتم طيبين… بعيداً عن أي جانب ديني أو روحاني لرمضان، هو واقع إن بيحصل تغيير في طريقة حياتنا في الشهر ده مقارنة بباقي ال١١ شهر بتوع السنة. سواء عشان قلة الأكل أو النوم أو عدم شرب القهوة أو السجاير في نهار رمضان، كل ده بيأثر على معدلات التركيز والطاقة عند الناس في الدراسةأو الشغل في رمضان.

هنتكلم ازاي تقدر تستعد من بدري وازاي تخلي شغلك أو دراستك ماشيين تمام في رمضان من غير تأثير كبير. عايز أوضح بس إن بعيد عن الجانب الديني والثواب المترتب على الصيام، أنا من أكتر المؤمنين بفوايد الصيام بشكل عام. فوايد الصيام عظيمة على الجسم والعقل والهدوء النفسي والتحكم في الأعصاب والتركيز في الأولويات. فكرة إن مش داخل لجسمك طاقة من خلال الأكل في النهار، بتجبرك توظف الطاقة اللي موجودة بأفضل شكل وبتساعدك على التركيز. الصيام وفوايده مش بس في الدين الإسلامي لكن في ديانات وثقافات تانية كتير، كنت شوفتها في حلقة حلوة جداً للدحيح (١).

هل القهوة والنيكوتين وَهم كبير زي ما موبينيل بتقول؟

في رمضان ٢٠٠٩ موبينيل عملت إعلان: أستاذ “سيبني في حالي الدنيا صيام” (٢) اللي فيه الراجل ده بيتكلم قد ايه هو خرمان (تعبان ومش فايق) عشان خاطر تأثير نقص القهوة والسجاير… بجد الراجل ده بيوصف حالة الناس اللي كل سنة بيشتكوا نفس الشكوى من التعب وعدم التركيز وقلة النوم.
بعدها الكورال اللي حواليه بيغنوا: انسى القهوة والنيكوتين، دول وهم كبير خلينا ساكتين.

مربط الفرس هنا بقى في كلمة وهم دي، هل ياترى هم فعلاً وهم والناس اللي بتشربهم بيمثلوا وبيزودوها في رمضان لما بيقولوا إنهم فعلاً تعبانين ومش قادرين؟ ولا دي حقيقة علمية إن بعد مرحلة من التعود على المواد دي، مش سهل التخلص منها فجأة؟

-التدخين: على قد ما أنا من أشد أعداء التدخين (بكل أنواعه)، لكن مضطر اعترف إن علمياً مادة النيكوتين اللي موجودة في السجاير مش وهم كبير ولا مادة سهل التخلص المفاجئ منها، خصوصاً لو بقالك فترة بتستخدمها (٣). هي مادة مدمنة بتحفز افراز هرمون الدوبامين في المخ، اللي بيؤدي للشعور بالسعادة. عشان كده علطول العقل بيربط بين الشعور ده والتدخين، فيبقى بيدور علطول على المادة دي.

*ممكن أكتب كتييير عن خطورة التدخين والتأثير المميت على حياة البني آدم واللي حواليه، بس مش ده هدفنا انهاردة… بس بجد ياجماعة التدخين (بكل أنواعه) كارثة بكل المقاييس. أنا شفت أبويا (الله يرحمه) بيقع من طوله سنة ١٩٩٢ وبيضطر يسافر برة يعمل عملية قلب مفتوح بسبب التدخين. الحمد الله إنه بطل تدخين بعدها وبقى رمز للرياضة.

-القهوة: الكافيين موجود في القهوة أو الشاي أو المشروبات الغازية، مع اختلاف الدرجات طبعاً، وبرضه بيسبب أثر مشابه لتأثير النيكوتين أو المواد المخدرة بس بدرجة أخف. وقف شرب القهوة لكام يوم بعد التعود عليها لفترة بيبقى ليه تأثير زي الصداع والتعب والتوتر والصعوبة في التركيز (٤).

استعد ازاي بقى للدراسة أو الشغل في رمضان؟

١- حضر جسمك من قبلها، بالتدريج

محدش فينا هيتفاجئ بميعاد بداية رمضان، ممكن يفرق في يوم، بس مش اللي هو حاجة في علم الغيب… زي ما بتحضر لاجتماع كبير أو بتذاكر لامتحان كبير أو بتتمرن لسباق، محتاج تعمل نفس الكلام مع رمضان. بما إنه مش أول رمضان تصومه، فأنت عارف ايه التغيرات اللي بتحصل فيه وبتتعبك وبتشتكي منها،

محدش فينا هيتفاجئ بميعاد بداية رمضان، ممكن يفرق في يوم، بس مش هو اللي هو حاجة في علم الغيب. زي ما بتحضر لاجتماع كبير أر بتذاكر لامتحان كبير أو بتتمرن لسباق. محتاج تعمل نفس الكلام مع رمضان. بما إنه مش أول رمضان تصومه، فأنت عارف ايه التغيرات اللي بتتعبك وبتشتكي منها، لإنها طبعاً بتفرق من شخص للتاني.

عود جسمك من بدري تدريجياً على قلة النيكوتين والكافيين في الوقت ده من اليوم. متستناش إنك تصدم جسمك فجأة في أول يوم رمضان وتنزل من ٣ كوبايات قهوة و١٢ سيجارة لصفر، طبيعي هيحصل اضطراب. حتى لو عملت الموضوع ده بأسبوع بس قبلها، هيفرق معاك جداً. بدل ما ٣ كوبايات قهوة الصبح، خليهم ٢ لمدة كام يوم وبعد كده كوباية واحدة لحد قبل رمضان. بدل ما هم ١٢ سيجارة الصبح، خليهم ٩ وبعد كده ٦ و بعد كده ٣ (وياريت تبطل خالص سجاير بالمرة). ولو بتشرب كميات قهوة أو سجاير أقل من كده في العادي، حاول تبطلهم خالص الصبح في اليومين اللي قبل رمضان.

٢- حدد أولوياتك جوة الشغل أو الدراسة

الوقت ضيق، ومش كل الناس قادرة تدي ١٠٠٪؜ سواء بجد تعبانين ولا بيمثلوا بحكم العادة، وأنا شايف إن دي فرصة إنك تبقى عارف ايه المهم وايه اللي هو مش أساسي. ودي حاجة مش كل الناس بتعرف تحددها. بالعكس, بيفتكروا إن أي حاجة وكل حاجة مهمة وأساسية وهتفرق في مسارهم الوظيفي أو في الدراسة. مع إن في الحقيقة، فيه حاجات كتير مش أساسية بتتعمل بتبقى نتيجتها تضييع للوقت وفقد التركيز عن الأولويات.

مبتكلمش هنا عن الناس اللي مبتشتغلش وبتستغل أي حاجة عبيطة عشان تتحجج إنهم مشغولين ومش ملاحقين، بتكلم على اللي بيشتغل أو بيذاكر بجد وفاكر إنه هيعرف يعمل كل حاجة في نفس الوقت. بالعكس هو كده بيلبس نفسه أكتر. بدل مايبقى متميز ومتفوق في الأولويات، هيبقى متوسط الأداء.

مصفوفة ايزنهاور:

الطريقة دي بتساعدك في تحديد أولوياتك. والمصفوفة دي بتتكون من ٤ مربعات بيتم تحديدها على أساس الأهمية وإنها حاجة طارئة أو مستعجلة ولا لأ. ومنها تقدر تعرف ايه الحاجات اللي في الشغل أو في الدراسة أو في حياتك العادية اللي جوة رمضان مهم بالنسبة ليك ولازم تخلقله وقت وتعمله دلوقتي، وايه اللي ممكن يتأجل، وايه اللي ممكن حد يعمله بدالك، وايه الحاجة اللي مجرد تضييع وقت ولازم تبطلها.
فيه لينك في أخر المقالة لشرح المصفوفة دي بتفاصيل أكتر (٥).

٣- خطط يومك وتجنب اضطراب ال FOMO

شفنا ازاي نقلل من مشكلة النيكوتين والكافيين، وحددنا أولوياتنا في الشغل أو الدراسة عشان هم دول اللي نركز عليهم. جيه وقت إنك تخطط ليومك من قبلها، وتبقى عارف هتمشي أولوياتك ازاي. هتصحى امتى، وهتروح الشغل أو الجامعة من كام لكام، هترجع تنام قبل الفطار ولا هتلعب رياضة ولا هتقرا قرأن ولا هتساعد في التحضير للفطار. وتخطط حتى هتاكل ازاي على الفطار، هتفطر حاجة بسيطة وبعد كده تكمل بعد شوية، ولا هتاكل مرة واحدة عادي وماتتسحرش،
اختار اللي يريحك وميتعبكش. الفكرة إنك تكون ممشي خطة اليوم وعارف إن الخطة دي ماشية مع أولوياتك اللي انت حاططها جوة الشغل والدراسة أو براهم.

ياريت بقى ترمي مشكلة ال FOMO ورا ضهرك، معناها Fear Of Missing Out يعني الخوف إن يبقى فايتك حاجة (٦)، أصل الاضطراب ده بيبقى في متابعة السوشيال ميديا, لكن المشكلة دي بتتجلى في رمضان في حاجات كمان مختلفة: إنك عايز تتفرج على المسلسلات والبرامج كلها وعايز تشوف ماتشات وإعلانات وتشوف الناس بتقول ايه على النت، ماهو لازم طبعاً الاستديو التحليلي لكل مسلسل وإعلان. ده غير طبعاً أي سحور أر فطار يحصل لازم أبقى هناك، أومال أسيب حاجة تحصل من غير ما ابقى موجود فيها!

أنا رأي الشخصي إن ال FOMO ده مرض وبيتعب الشخص ويدمره صحياً ونفسياً لإنه مش ملاحق يعمل ايه ولا ايه، ومتوتر علطول وحاسس إنه مش مقفل اللعبة. ده غير طبعاً تأثير كل ده على نومه ولا طريقة أكله اللي بيأثر على شغله ودراسته…

حدد أولوياتك وابني خطة يومك على الأساس ده، انت مش سوبر مان/ومان عشان تعمل كل حاجة في نفس الوقت. ولو اللي فايتك ده مش أهم حاجة بالنسبة ليك يبقى ماتضيعش وقت فيه.

راعي إرهاق الناس حواليك في رمضان

مهما مشينا على الخطوات اللي فاتت وحضرنا جسمنا للتغيير عن المعتاد في الأكل أو النوم، وقللنا تدريجياً القهوة والتدخين، هيفضل فيه شوية اضطرابات بسيطة عن اليوم العادي. ولو أنت شخص متميز وبالنسبة ليك نهار رمضان تمام كمعدلات تركيز وإنتاجية، لازم تراعي إن مش كل الناس زيك، وهتفضل تتعامل مع ناس حواليك مرهقين جسدياً وذهنياً بسبب التغيير عن المعتاد في رمضان، سواء في الشغل أو في الجامعة أو في الشارع أو في البيت.

ساعتها من التميز اللي أنت وصلتله إنك تقدر تبقى أهدى في تعاملاتك وتصرفاتك، وتترفع عن صغائر الأمور، خليك أنت الكبير ياسيدي وماتصغرش دماغك على حاجات بسيطة وممكن تعدي. لإن للأسف فيه ناس بتنزل من بيتها الصبح في رمضان وهم بيتخانقوا مع دبان وشهم أساساً ومش طايقين نفسهم. في منهم اللي فعلاً ممكن يكون عنده مشاكل أو فعلاً التغييرات في رمضان مأثرة عليه، وفي منهم اللي مزودها وهو داخل رمضان وعامل حسابه إن الطبيعي إني ابقى متعصب وبزعق في نهار رمضان.

أنا معاك إن النوع التاني ده، اللي بيمثل ودور العصبي وسع منه شوية (دايماً تلاقيه بيتخانق وهو سايق العربية) يستاهل ياخد فوق دماغه ومستفز، بس الأحسن ليك وليه إنك تعامله بهدوء وتضحكله وتقوله حصل خير، كل سنة وانت طيب ورمضان كريم، هتلاقيه فجأة كده هدي وسكت واتكسف على دمه، وهيبقى شكله هو الغلطان، ويمكن ده يخليه يفكر تاني ويطلع من الدور اللي راسمه لنفسه في نهار رمضان.

*بما إن فيه ناس بتقابل مشكلة في تنظيم الأكل في روضان، انصحهم يقروا المقالة اللي كنا اتكلمنا فيها على طريقة أكل الناس في المناطق الزرقاء، أكتر المناطق سعادة وطول عمر في العالم (٧).

الخلاصة:

كلنا بنتأثر بتغيير الروتين في رمضان وده بيأثر على تركيزنا في الشغل أو الدراسة. حضر جسمك وقلل نيكوتين وكافيين بالنهار تدريجياً قبل رمضان… حدد أولوياتك وايه الحاجات المهمة ليك، باستخدام مصفوفة ايزنهاور… خطط يومك من قبلها طبقاً للأولويات وميهمكش لو فيه حاجات مش مهمة ليك فاتتك، ماهي مش مهمة ليك، حتى لو مهمة لغيرك… ومهما كان, لازم نراعي الإرهاق وتأثير تغيير الروتين على غيرنا من الناس ونستحمل شوية ونبتسم ونقولهم رمضان كريم…
كل سنة وأنتم وأسركم وحبايبكم وأصحابكم طيبين.

المصادر والمراجع:

١- حلقة الدحيح عن الصيام

٢- إعلان سيبني في حالي الدنيا صيام

٣- مقالة عن النيكوتين وتأثيره

https://www.hss.gov.nt.ca/en/services/health-effects-tobacco/nicotine-it%E2%80%99s-why-smoking-so-addictive

٤- مقالة عن الكافيين وتأثيره

https://www.webmd.com/diet/caffeine-myths-and-facts

٥- مقالة عن مصفوفة ايزنهاور

https://www.tathwir.com/2022/08/Eisenhower-Matrix%20.html

٦- مقالة من فوربس عن اضطراب ال FOMO

https://www.forbes.com/health/mind/the-psychology-behind-fomo/#:~:text=%E2%80%9CFOMO%20includes%20both%20the%20perception,existed%20long%20before%20social%20media.%E2%80%9D

٧- مقالة من اتعلمت ايه عن المناطق الزرقاء في العالم وعادات الأكل

https://et3alemteh.com/?cat=47