“الفيديو ده ضرب إعلانات رمضان اللي بيطلعوا فيها الجيران في الكمبوند ولاد ناس”. ده كان تعليق على فيسبوك على الفيديو اللي انتشر من ١٠ أيام لخناقة بين جيران في كمبوند، كان فيه ست بتجري ورا جارها بعصاية المقشة (١). طبعاً الناس على السوشيال الميديا فتحوا الستديو التحليلي وبيقولوا رأيهم في اللي حصل والأسباب والتداعيات. أنا مش فارق معايا تفاصيل الخناقة ولا مين غلطان ومين صح، بس كلمة “ولاد ناس” في التعليق ده هي اللي وقفت عندها.

بتقصد ايه بكلمة ولاد ناس لما بتقولها؟ بتستخدمها عشان توصف حد مقتدر مادياً ومعاه عربية حلوة وساكن في كمبوند مثلاً؟ بيبقى قصدك بيها إن ولاد الناس دول اللي معاهم فلوس هم اللي أخلاقهم عالية ومبيغلطوش وماتطلعوش منهم العيبة؟

لو ده تفكيرك في كلمة ولاد ناس واستخدامك ليها، فأنا جاي انهاردة أغيرلك المفهوم ده خالص.

خصوصاً إن الفيديو ده مش أول ولا أخر حاجة هنشوفها من ناس ساكنين في كمبوند، معلق معايا فيديو الراجل اللي تعدى بالضرب على فرد الأمن في كمبوند في المعادي من كام سنة (٢).

معنى كلمة ولاد ناس

طبعاً المعنى الحرفي واضح، لإنها كلمة بتوصف البشر مقارنة بباقي المخلوقات، وده ساعتها بيشمل كل الناس، اللي معاه فلوس واللي معاهوش، اللي أخلاقه عالية واللي شبه معندوش أخلاق.

بس لما ندور في معجم المعاني على ولاد ناس أو بالأخص ابن ناس، نلاقي إن معناها: شخص من أسرة كريمة (٣). ولما ندور أكتر نلاقي إن المقصود بكلمة كريمة أكتر هو: الأسرة كريمة الأصل هي التي تكون من عائلة معروفة بالأخلاق الحسنة (٤).

يعني ولاد ناس بيبقى مقصود بيها: من أسرة معروفة بالأخلاق الحسنة، مجبناش سيرة الفلوس ولا القدرات المادية ولا العربيات ولا الكمبوند!

دراسة علمية: هل كل المقتدرين مادياً ولاد ناس فعلاً؟

هنتكلم على دراسة حصلت في أمريكا على مدار ٦ سنين بتتابع سلوكيات الناس اللي بتبقى معاهم أفضلية مادية, حتى لو أفضلية في لعبة. كل جزء من الدراسة دي اتعمل على المئات من الأشخاص (٥):

١- المونوبلي: (لعبة شبه بنك الحظ) وفي الدراسة كانوا بيبجيبوا شخصين يلعبوا قصاد بعض، بس كان الباحثين مضبطين الورق اللي في اللعبة ان يبقى فيه أفضلية لشخص عن التاني في الورق اللي متوزع والزهر اللي بيلعبوا بيه. مكانش حد قايل للشخصين اللي بيلعبوا قبل مايبدأوا إن فيه أفضلية لحد عن التاني… وبعد أقل من خمس دقايق، الشخص اللي معاه أفضلية في اللعب بدأ يبين غرور واضح ويتعامل بعنجهية مع الشخص التاني (الأفقر في اللعبة) ويسخف عليه. رغم إن في الأول خالص قبل مايبدأوا، كان الشخصين كويسين مع بعض جداً. (طبعاً التجربة دي اتعملت على مئات من الأشخاص).

٢– العربيات الغالية:
عملوا تجربة في كاليفورنيا على نوعية العربيات اللي بتقف عند خطوط عبور المشاة لما بيشوفوا حد عايز يعدي. والباحثين اختاروا كاليفورنيا عشان هناك بالقانون أنت لازم توقف العربية لو لقيت حد عايز يعدي الشارع من عند خطوط عبور المشاة… النتيجة إن كل اللي سايقين عربيات رخيصة وقفوا عند عبور المشاة، ولا عربية من المئات اللي اتعمل عليهم الدراسة كسرت القانون وكملت عادي. لكن كل لما تمن العربية بيزيد بنلاقي احتمالية كسر القانون وإن السواق بيمشي عادي من عند خطوط المشاة بيزيد أكتر. لدرجة إن تقريباً ٥٠٪؜ من العربيات الأكثر رفاهية كسر القانون وكمل بالعربية عادي!

٣- مساعدة الغير: الباحثين جابوا في مركز الأبحاث ناس أغنياء بيكسبوا حوالي ١٥٠ ألف دولار في السنة أو أكتر، وجابوا ناس تانية بيكسبوا ما بين ١٥ و٢٥ ألف دولار في السنة. الباحثين قابلوا كل شخص لوحده من مئات الأشخاص دول، وقالوا ليهم: لو دلوقتي ادينا لحضرتك ١٠ دولار، ومعاك اختيار إنك تدي جزء من ال١٠ دولار لحد غريب انت متعرفوش، ممكن يكون محتاج الفلوس دي, هتعمل ايه؟ النتيجة كانت إن الناس اللي بيقبضوا في الحقيقة رقم أقل ادوا للشخص الغريب اللي محتاج مساعدة فلوس ب ٤٤٪؜ أكتر من الناس اللي بيقبضوا فوق ال١٥٠ ألف دولار في السنة!

٤- بونبوني الأطفال: جابوا ناس مختلفين في مستواهم المادي، وقالوا لكل شخص يعد يستنى شوية لحد ماحد من الباحثين هيجي يقابله،. وعلى الترابزة قدامهم حطوا طبق كبير مليان بونبوني، وقالولهم وأكدوا عليهم إن البونبوني ده محجوز لأطفال جايين كمان شوية… المفاجأة إن الأشخاص اللي بيعتبروا نفسهم أغنياء أخدوا من البونبوني بتاع الأطفال ضعف الكمية اللي أخدها الناس اللي بيعتبروا نفسهم فقراء !

الأقل قدرة مادياً، هل هم “ولاد ناس” أقل من غيرهم؟

-قطعة البيتزا: في تجربة بحثية، واحد في الشارع راح طلب من ناس بياكلوا, إنهم يدولوا جزء من أكلهم عشان هو جعان ومعهوش فلوس. النتيجة إن كل الناس اللي شكلهم مقتدر مادياً رفضوا يشاركوا الشخص الغريب ده جزء من أكلهم. وده ممكن يكون رد فعل عادي، بس اللي حصل إن فيه ناس هزأوا الراجل ده واتكلموا معاه بأسلوب سئ جداً (٦).

في الجزء الثاني من التجربة، ادوا باقي من بيتزا لشخص قاعد في الشارع شكله فقير مادياً، وبعد كده بعتوا شخص تاني للراجل اللي أخد البيتزا، وطلب منه إنه يشاركه جزء من البيتزا عشان هو جعان ومعهوش فلوس؛ وعلى عكس اللي شفناه في الجزء الأول من التجربة، الراجل الفقير مادياً ماترددش ثانية وشارك البيتزا مع الشخص اللي جاله، لإنه حاسس باحتياجه للأكل… كده نقدر نعتبره من ولاد الناس بأخلاقه الكريمة دي؟

-الإشارات: طب ركز كده في الإشارات والشوارع الزحمة هتلاقي بعض سواقين الميكروباصات والتاكسيات بيدوا مساعدات للناس اللي واقفين محتاجين فلوس، زيهم زي اللي راكبين عربيات ملاكي غالية، إن لم يكن أكتر في بعض الحالات.. رغم إن السواقين دول برضه رزقهم على قدهم، مش اللي هو معاهم فايض كبير من الفلوس، لكن برضه بيبقوا عايزين يساعدوا الأقل قدرة مادياً منهم. يبقى اللي بيعمل كده من ولاد الناس بمساعدتهم لغيره رغم ظروفه ولا لأ؟

*كنا اتكلمنا في مقالات المنطقة الزرقاء على احترامهم وتواصلهم مع بعض وازاي ده ممكن يكون من ضمن أسباب إن متوسط الأعمار عندهم عالي. في المقالات دي ماجبناش سيرة قدراتهم المادية ولا مدى ثرائهم. ولاد ناس برضه بأخلاقهم الحسنة (٧).

الخلاصة:

وصف “ولاد ناس” ده بينطبق على الأشخاص اللي أخلاقهم حسنة، بغض النظر هم ساكنين في كمبوند ولا في عشش. في كل مستوى اجتماعي هنلاقي اللي أخلاقه كويسة ومتربي وهنلاقي الحرامي والنصاب والكذاب والبلطجي، بس كل واحد بطريقته. فبلاش نربط الأخلاق سواء كويسة أو وحشة بالطبقة الاجتماعية أو القدرات المادية عشان مفيش علاقة مباشرة بينهم زي ماشفنا في التجارب والأمثلة اللي فوق.

المصادر والمراجع:

١- خناقة كومبوند الشيخ زايد
https://youtube.com/shorts/kFl1XBPE4x4?feature=share

٢- اعتداء ساكن على فرد أمن في كمبوند في المعادي
https://www.youtube.com/shorts/8sGn3-BuC78

٣- معنى كلمة ابن ناس في معجم المعاني
https://www.almaany.com/ar/dict/ar-ar/%D8%A7%D8%A8%D9%86-%D9%86%D8%A7%D8%B3/

٤-معنى كلمة أسرة كريمة في معجم المعاني
https://www.almaany.com/ar/dict/ar-ar/%D8%A3%D8%B3%D8%B1%D8%A9-%D9%83%D8%B1%D9%8A%D9%85%D8%A9/

٥- دراسة عن تأثير الفلوس على سلوكيات الأفراد
https://www.ted.com/talks/paul_piff_does_money_make_you_mean?language=en

٦- رجل فقير يشارك طعامه مع أخرين
https://www.youtube.com/watch?v=8Opa7_RE664

٧- المناطق الزرقاء – التواصل مع بعض
https://et3alemteh.com/?p=337